هێزه‌كانی سوریا دیموكراتیك به‌شیكی زۆری شاری ته‌بقه كۆنترۆڵ ده‌كه‌ن
K24 - ھەولێر
هێزه‌كانی سوریا دیموكراتیك - هه‌سه‌ده له دوایین هه‌ڵمه‌تەكەیان بۆ كۆنترۆڵكردنی شاری ره‌ققه‌ی پایته‌ختی دیفاكتۆی داعش، زۆربه‌ی گه‌ڕه‌كه‌كانی شارۆچكه‌ی ته‌بقه به دووری 55 كیلۆمه‌تری ره‌ققه كۆنترۆڵ ده‌كه‌ن.
پاش ئه‌وه‌ی هێزه‌كانی سوریای دیموكراتیك 6 گه‌ڕه‌كی دیكه‌یان له سه‌نته‌ری شاری ته‌بقه‌یان كۆنترۆڵكرد، چه‌كدارانی داعش له لای رۆژهه‌ڵات و باشووری شاره‌كه هێرشیانكرده سه‌ر شه‌ڕڤانان و به‌هۆیه‌وه شه‌ڕێكی سه‌خت روویدا.
ھێزه‌كانی سوریای دیموكراتیك ئیواره‌ی رۆژی شه‌ممه‌ی رابردوو گه‌ڕه‌كانی (مه‌هاجی، بوسه‌راب، ئه‌بو عه‌یش، كه‌نیسه‌ی ئاشووری، كه‌سار و موشایر)یان كۆنترۆڵكرد.
میدیا لۆكالییه‌كانی رۆژئاوای كوردستان بڵاویانكرده‌وه، پاش كۆنترۆڵكردنی ئه‌و شه‌ش گه‌ڕه‌كه، چه‌كدارانی داعش ده‌ستیان به هێرشێك كرد و له شاری ره‌ققه‌وه هێزیان بۆ ته‌بقه نارد و به‌هۆیه‌وه شه‌ڕێكی سه‌خت روویدا، بەتایبەتی لە گوندی ئابڵۆقەدراوی عەباد لە رۆژھەڵاتی شاری تەبقە.
ئۆپەراسیۆنی "توڕەیی فورات" بۆ كۆنترۆڵكردنی رەققە رۆژی 5 تشرینی دووەمی 2016 دەستیپێكرد و ھێزەكانی سوریای دیموكراتیك لە سێ قوناغی یەكەمی ئۆپەراسیۆنەكە، ناوچەیەكی زۆریان لە دەوروبەری رەققەیان كۆنترۆڵكرد و بۆ یەكەمجاریش چوونەتە ناو سنووری پارێزگای دێرەزۆر.
ئۆپەراسیۆنی كۆنترۆڵكردنی شاری تەبقە لە رۆژی 21 ئاداری رابردوو دەستیپێكرد.