جێگری بەڕێوەبەری كۆمپانیای غازی باكوور لە كەركووك كوژرا
K24 - كەركووك
پەیامنێری كوردستان24 لە كەركووك رایگەیاند: "محەمەد یونس جێگری بەڕێوەبەری كۆمپانیای غازی باكوور لە كەركووك كوژرا".
گوتیشی: " جێگری بەڕێوەبەری كۆمپانیای گازی باكووری كەركووك لە نزیك بازگەی یەكی حوزەیران كوژراوە و ئێستا تەرمەكەی لە نەخۆشخانەی ئازادی شاری كەركووكە".
محەمەد یونس لە دایكبووی ساڵی 1964 و لە نەتەوەی كوردە و لە رووی سیاسیەوە سەر بە پارتی دیموكراتی كوردستانە.
پەیامنێرمان راشیگەیاند: "لە لایەن چەند چەكدارێكی نەناسراو لە نێو ئۆتۆمبێلێك، دەستڕێژی گولـلە لە ئۆتۆمبێلی جێگری بەڕێوەبەری کۆمپانیای غازی باکوور کراوە، لە ئەنجامدا خۆی و یەکێک لە پاسەوانەکانی کوژران".
ئەوەشی خستەڕوو: "لێكۆڵینەوە لە رووداوەكە دەستی پێكردووە، بەڵام تا ئێستا لایەنە پەیوەندیدارەکانی پارێزگای کەرکووک، هیچ زانیارییەکان لەبارەی رووداوەکە نەخستووەتەڕوو".