قه‌ته‌ر باوه‌ش بۆ ئێران ده‌كاته‌وه
K24 – هه‌ولێر
رۆژێك پاش ئه‌وه‌ی قه‌ته‌ر داواكاری 13 خاڵی، چوار وڵاتی عه‌ره‌بی ره‌تكرده‌وه، ئه‌میری ئه‌و وڵاته له په‌یوه‌ندییه‌كی ته‌له‌فۆنیدا له‌گه‌ڵ سه‌رۆك كۆماری ئێران، پشتیوانی و ھاوكاری وڵاتەكەی بۆ قەتەر راگه‌یاند.
نووسینگەی رۆژنامەوانی سەرۆك كۆماری ئێرانی بڵاویكرده‌وه، لە پەیوەندییە تەلەفۆنییەكەدا نێوانیاندا" جەخت لە پەیوەندی نێوان تاران و ده‌وحه كرایەوە، بۆ چاره‌سه‌ركردنی كێشه‌كانی جیهانی ئیسلامیش ئاماده‌یی خۆیان دەربڕی كە ھەردوولا ھاوكاری یەكتربن".
روحانی به ره‌تكردنه‌وه‌ی "ئابلوقه‌ی" عه‌ره‌بستان و وڵاتانی دیكه‌ی عه‌ره‌بی به سه‌ر قه‌ته‌ر رایگه‌یاند "سنووری ئاسمان، زه‌وی و ده‌ریای ئێران هه‌میشه به‌سه‌ر وڵاتی برا و دراوسێ كراوه‌یه".
هه‌ر پاش ئه‌وه‌ی كه هه‌ر چوار وڵاتی عه‌ره‌بستان، ئیمارات، میسر و به‌حرێن سزایان خسته سه‌ر قه‌ته‌ر و به پچڕاندنی په‌یوه‌ندییه‌كانیان له‌گه‌ڵ ئه‌م وڵاته، ته‌واوی سنووره‌كانیان به‌سه‌ر قه‌ته‌ر داخست، حكوومه‌تی ئێران ئاماده‌یی خۆی بۆ كردنه‌وه‌ی سنووره‌كانی به‌سه‌ر قه‌ته‌ر راگه‌یاند و ده‌یان تۆن خۆراك و خوارده‌مه‌نی بۆ ئه‌و وڵاته نارد و ئاسمانی وڵاته‌كه‌شی به سه‌ر فڕۆكه‌كانی قه‌ته‌ر كرده‌وه و چوار به‌نده‌ریش بۆ هاتووچۆی كه‌شتییه‌كانی قه‌ته‌ر ته‌رخانكرد.
ئه‌میری قه‌ته‌ر له‌م په‌یوه‌ندییه ته‌له‌فۆنییه‌دا به سه‌رۆك كۆماری ئێرانی راگه‌یاند "باوه‌شی قه‌ته‌ر بۆ پێكه‌وه كاركرین و هاوكاری كراوه‌یه".
هه‌ر چوار وڵاتی عه‌ره‌بی رۆژی هه‌ینی رابردوو به مه‌به‌ستی ئاساییكردنه‌وه‌ی په‌یوه‌ندییه‌كانیان له‌گه‌ڵ قه‌ته‌ر لیستێكی 13 خاڵییان پێشكه‌شی ئه‌و وڵاته كرد و 10 رۆژ مۆڵه‌تیان دایه ئه‌میری قه‌ته‌ر بۆ جێبه‌جێكردنی.
ئه‌م داوكارییه دوای دوو رۆژ له لایه‌ن ئه‌میری قه‌ته‌ر ره‌تكرایه‌وه، بێ ئه‌وه‌ی كه به شێوه‌یه‌كی فه‌رمی رابگه‌یه‌نرێت، به‌ڵام ره‌جەب ته‌یب ئه‌ردۆغان سه‌رۆك كۆماری توركیا له لێدوانێكی رۆژنامه‌وانی پاش نوێژی جه‌ژنی ره‌مه‌زان گوتی "پشتگیری له هه‌ڵوێستی قه‌ته‌ر به‌رامبه‌ر ره‌تكردنه‌وه‌ی داواكارییه‌كانی چوار وڵاتی عه‌ره‌بی ده‌كه‌ین".
هه‌ر چوار وڵاتی عه‌ره‌بی له یه‌كه‌م خاڵدا داوایان كرد قه‌ته‌ر ئه‌ندامانی سوپای پاسداران له وڵاته‌كه‌ی ده‌ربكات و په‌یوه‌ندییه سه‌ربازی و ئه‌منییه‌كانی له‌گه‌ڵ ئێران بپچڕێنێت و ئاستی په‌یوه‌ندییه دیپلۆماسییه‌كانی له‌گه‌ڵ تاران كه‌م بكاته‌وه و په‌یوه‌ندییه بازرگانییه‌كانیشی له‌گه‌ڵ ئێران له چوارچێوه‌ی سزاكانی نێوده‌وڵه‌تی و ئه‌مریكادا رێك بخاته‌وه.
داخستنی بنكه‌ی سه‌ربازی توركیا له قه‌ته‌ر و داخستنی كه‌ناڵه‌كانی ئه‌لجه‌زیره و راگرتنی پشتگیری قه‌ته‌ر به رێكخراوه‌كانی قاعیده، داعش، فه‌تحولشام (به‌ره‌ی نوسره‌ی پێشوو) و حزب الله له گرنگترین داوكاری چوار وڵاتی عه‌ره‌بین له قه‌ته‌ر.
