ماره‌كان ده‌گه‌ڕێنه‌وه كونه‌كانی پێشوویان
K24 - هه‌ولێر:
به‌گوێره‌ی راپۆرتێك كه به‌دواداچوونی وردی تێداكراوه، هه‌زاران چه‌كداری داعش كه له مه‌یدانه‌كانی جه‌نگ له سووریا و عێراق رایانكردووه، چوونه‌ته ناو خاكی توركیا و ئاسانكاریان بۆكراوه‌و له ئاستی میللیشدا باوه‌شیان بۆكراوه‌ته‌وه.
كه‌ناڵی سكای نیووزی بریتانی بڵاویكردووه‌ته‌وه "چه‌كداره‌كان خاوه‌ن وڵاتینامه‌ی جۆراوجۆرن و له‌م دواییانه‌دا چوونه‌ته توركیا و له‌و ده‌رگایه‌ی هاتنه عێراق و سووریا هه‌ر له‌و ده‌رگایه‌شه‌وه رۆیشتوونه‌ته‌وه".
به‌گوێره‌ی راپۆرته‌كه، له‌وكاته‌ی به‌رپرسانی ئه‌مریكی ده‌ڵێن، زۆرینه‌ی چه‌كدارانی داعش له مه‌یدانه‌كانی جه‌نگ له عێراق و سووریا كوژراون، به‌ڵام قاچاغچییه‌كان و ئه‌و تۆڕانه‌ی بازرگانی به مرۆڤه‌وه ده‌كه‌ن پێچه‌وانه‌ی به‌رپرسه ئه‌مریكییه‌كان ده‌ڵێن".
قاچاغچییه‌كان به پێگه‌ی ئه‌لیكترۆنی "BuzzFeed"ـی ئه‌مریكیان گوتووه: "ساڵی رابردوو ژماره‌یه‌كی زۆر له چه‌كداره توندڕه‌وه‌كانی داعش و خێزانه‌كانیان توانیوویانه خۆیان بگه‌یه‌ننه‌وه توركیا".
هه‌روه‌ها له توركیاشه‌وه چه‌كداره‌كان توانیوویانه بگه‌نه ئه‌و رێگانه‌ی كه كۆچه‌ره‌كان لێیه‌وه ده‌ڕۆنه ئه‌وروپا و ئاسیا، هه‌مان ئه‌و رێگانه‌ی كاتێك بۆ شه‌ڕكردن له رێزی رێكخراوه توندڕه‌وه‌كه لێیه‌وه هاتن و له سه‌رانسه‌ری جیهانه‌وه روویانكرده عێراق و سووریا و به "خاكی خه‌لافه‌ت" ناویان ده‌برد، ئێستا به‌و رێگانه‌دا ده‌ڕۆنه‌وه".
پیاوێك كه ماڵه‌كه‌ی له ناوچه‌یه‌كی سنوورییه له توركیا ده‌ڵێت: "شارۆچكه‌كه‌مان بووه‌ته پێگه‌یه‌ك بۆ هاتنی ئه‌و جۆره كه‌سانه و له‌ماوه‌ی چه‌ند مانگێكدا 12 چه‌كدار و سه‌ركرده‌ی داعش لێره‌وه تێپه‌ڕێوون".
ئه‌و پیاوه كه پێگه ئه‌لیكترۆنییه‌كه ناوی نه‌بردووه گوتوویه‌تی: "زۆرینه‌ی چه‌كداره‌كان مانه‌وه له توركیا هه‌ڵده‌بژێرن، به‌ڵام ژماره‌یه‌كیشیان پاره ده‌ده‌نه قاچاغچییه‌كان و به رێگای ده‌ریاوه خۆیان ده‌گه‌یه‌ننه یۆنان".
پیاوێكی دیكه‌ش ده‌ڵێت: "پێشوازیمان له ژماره‌یه‌ك له ئه‌ندامانی داعش و خێزانه‌كانیان كردووه، ئه‌وان به زمانی جیاواز قسه ده‌كه‌ن، به درێژایی سنوور دزه‌ده‌كه‌نه ناو توركیا".
ئه‌و پیاوه كه هاووڵاتییه‌كی سوورییه ده‌ڵێت "عێراقی و سوورییه‌كان كه‌سانێك به قاچاغی دێنن كه به زمانی عه‌ره‌بی قسه ناكه‌ن".
هه‌روه‌ها گوتوویه‌تی: "ئه‌وانه‌ی بیانه‌وێت له‌سه‌ر رێبازی داعش بمێننه‌وه، ده‌رفه‌تێكی گه‌وره‌یان له به‌رده‌سته تا ئه‌و كاره بكه‌ن، ئه‌گه‌ر هاتوو بتوانن عێراق و سووریا جێبهیڵن و خۆیان بگه‌یه‌ننه ناوچه‌یه‌كی دیكه‌ی سه‌ر زه‌وی".
"BuzzFeed" له زاری به‌رپرسانی هه‌واڵگریی ئه‌مریكاوه نوسیوویه‌تی "ئه‌و جۆره هه‌ڵاتن و قاچاغیكردنه هاوكار ده‌بێت بۆ ئه‌وه‌ی جه‌نگی ھێشتنه‌وه‌ی داعش بۆ قۆناغی داهاتوو سه‌ربگرێت، هه‌ر ئه‌وانیش ده‌توانن شێوه‌ی چالاكییه‌كانی داهاتوویان دیاری بكه‌ن، به‌تایبه‌تی پاش ئه‌وه‌ی ئه‌و رووبه‌ره فراوانه خاكه‌ی له عێراق و سووریا خستبوویانه ژێر كۆنترۆڵی خۆیان، له ده‌ستیانچووه".