بەرپرسێكی یەكێتی دەستی لەكاركێشایەوە
K24 - سلێمانی
بەرپرسی نووسینگەی جێگری سکرتێری یەکێتی لە نامەیەكدا كە ئاراستەی كۆسرەت رەسوڵ، جێگری سكرتێری گشتی یەكێتی نیشتمانی كوردستانی كردووە، دەست لەكاركێشانەوەی خۆی راگەیاندووە و ئاماژە بەوەشدەكات لە مەكتەبی سیاسی یەكێتی دەستێوەردان لە كارەكانی كراوە.
بەپێی نامەیەك كە وێنەیەكی دەست كوردستان24 كەوتووە. جوتیار جەبار، بەرپرسی نووسینگەی جێگری سکرتێری یەکێتی دەست لەكاركێشانەوەی خۆی لە پۆستەكەی راگەیاندووە و ئەوە دەخاتەڕوو: "ماوەی نیوسەدە لەخەبات وتێکۆشان لەریزەکانی یەکێتی نیشتمانی کوردستان و قوربانیدان و ئەزیەت و ماندووبوون و شەونخونیم لەگەڵ بەڕێزتان بەتایبەت، بەبێ گوێدان بە دەستكەوت و پلە و پایە، كە خۆت ئاگاداری شەونخونی منی لەپێناو ئەو خاكە پیرۆزەدا".
ئەو نامەیە كە ئاراستەی كۆسرەت رەسوڵ، كراوە تێیدا ھاتووە: "لێرەوە بە بەڕێزتان رادەگەیەنم بەدەست لەكاركێشانەوەم لەبەرپرسی نووسینگەی بەڕێزتان لەمەكتەبی سیاسی بەهۆكاری دەستێوەردان لەئەركەكانم لەلایەن كەسێكی دیاریكراوی بێ ئەزموون. ئەوەش پێشێلێكی تەواوی ماندوبوون و رەنجەكەمە بەو شێوەیە پاداشتم دەدرێتەوە".
ئەوە لەكاتێكدایە لەماوەی ئەم دووساڵەی دواییدا بەتایبەتی پاش كۆچی دوایی مام جەلال، سكرتێری گشتی یەكێتی. بەرھەم ساڵح، جێگری سكرتێری یەكێتی و ژمارەیەك لە سەركردە و بەرپرسانی باڵای ئەو حزبە دەستیان لەكاركێشاوەتەوە، بەشێك لەوانەش لەگەڵ بەرھەم ساڵح، ھاوپەیمانی بۆ دیموكراسی و دادپەروەریان دامەزراندووە.
ھ.م