مارشی فەرمی خاوەن پێداویستییە تایبەتەکان بڵاودەكرێتەوە
K24 - سلێمانی
مارشی فەرمی خاوەن پێداویستییە تایبەتەکانی ھەرێمی كوردستان دوای تۆمار كردنی و تەواوبوونی كارەكانی ڤیدیۆ كلیپەكەی بڵاو دەكرێتەوە و داواش لە دامودەزگاكانی حكوومەت و لایەنە پەیوەندیدارەكان دەكرێت ئەو مارشە بە فەرمی وەك مارشی خاوەن پێداویستییە تایبەتەکان بناسێنن.
ئیسماعیل تاڵەبانی، شاعیر كە تێكستی سروودەكەی نوسیوە و بە كوردستان24ی گوت: "لە سەرەتایی دروست بوونی بیرۆکەیەک لە نێوان من و کاک محەمەد ئیسماعیلدا دوای ماندوو بوونێکی زۆر توانیمان خاوەن پێداویستییە تایبەتەکانی کوردستان بکەین بە خاوەنی مارش و لۆگۆیەکی تایبەت بە خۆیان، چونکە ئەوانیش هیچیان لە ئێمە کەمتر نییە. ناوەرۆکی تێکستەکە باس لەوە دەکات کە ئەوانیش خاوەنی خەون و داهێنان کاری جوانن ئامانجیان خزمەت کردنی وڵات و مرۆڤایەتییە، دەمانەوێت هەموومان پێکەوە درووشمی هاوخەمی نیشتیمان و هاوزمانەکانمان بگرینە ئەستۆ و پێکەوە بڵێن هەموومان پێکەوە جوانین".
گوتیشی: "ناوەڕۆکی تێکست و مارشەكە کار لەسەر بەهاو پیرۆزی خاوەن پێداویستیە تایبەتەکان دەکات و لە بەهاو قورسایی ئەوان کەمناکاتەوە، بەڵکو باس لە تواناو داهێنان و پێکەوە ژیان و یەکسانی، خۆشویستنی، مرۆڤایەتی و خزمەت کردنی خاک و نیشتیمان دەکات".
محەمەد ئیسماعیل، خاوەنی بیرۆكەی سروودی خاوەن پێداویستییە تایبەتەکان بۆ كوردستان24 ئاماژەی بەوەكرد: "لە راستیدا ئەم بیرۆکەیە بیرۆکەی من و شاعیری ناسراوی کورد کاک ئیسماعیل تاڵەبانی بوو، کە پێمان خۆش بوو بەکاری ئەخلاقی و مرۆیی خۆمان هەستین و خزمەتێکی بچووك بە هەموو خاوەن پێداویستیە تایبەتەکانی کوردستان بکەین، کە بریتییە لە مارشی و لۆگۆیەک بۆ هەموو خاوەن پێداویستییە تایبەتەکانی کوردستان، کە هۆنراوەی شاعیری ناسراوی کورد کاک ئیسماعیل تاڵەبانییە و ئاوازی کاک نیازی سەنتوورەو گوتنی سروودەكە بە کۆرسە و کاری وێنەگرتنی لەلایەن دیار مەهدیەوەیە بەسپۆنسەری چەند دەزگاو کەسایەتییەکی شاری سلێمانی کە لە تایتڵی مارشەدا بە رێزەوە ناویان دێنین و بەم نزیکانە بڵاوی دەکەینەوە".
ئەوەشی خستەڕوو: "ئێمە وەک خاوەن پێداویستییە تایبەتەکانی کوردستان داواکارین لە حکوومەتی هەرێمی کورستان و لایەنی پەیوەندیدار بە فەرمی ئەم مارشە بناسێنن و تا ببێتە لۆگۆیەکی فەرمی، چونکە هەم یەکێتی کەمئەندامانی کوردستان بە فەرمی پشتیگرمان بوون و هەم بەڕێوبەرایەتی رۆشنبیری و ھونەری سلێمانی".
ھ.م