تاقیگەی کۆرۆنا لە هەولێر... رۆژانە 24 کاتژمێر کارکردنی بەردەوام

K24 - هەولێر

تاقیگەی کۆرۆنا لە هەولێر، شوێنێکی هەستیار کە لەوەتەی بڵاوبوونەوەی پەتای کۆرۆنا، رۆژانە خەڵک چاویان لە ئەنجامی کارکردنی ئەوانەیە کە لە تاقیگەکەدا کار دەکەن.

کارمەندەکانی تاقیگەی کۆرۆنا لە هەولێر، بە جلوبەرگی تایبەتەوە بەجۆرێک هیچ شوێنێکی جەستەیان دیار نییە، کاردەکەن. ئەوان، رەنگە لە هەموو کەس زیاتر پێویستییان بەخۆپارێزی هەبێت لەو ڤایرۆسە، چونکە هەرکەسێک لە سنووری قەزای ناوەندی هەولێر تووشی کۆرۆنا بووبێت، سامپڵی لای ئەوانە.

موحسین دزەیی، بەڕێوەبەری تاقیگەکە لە لێدوانێکدا بۆ کوردستان 24 دەڵێ "لەو تاقیگەیەدا رۆژانە نزیکەی 800 سامپڵ پشکنینیان بۆ دەکرێت و بەگشتی ئێستا لە تاقیگەکەمان رۆژانە 50 بۆ 80 کەس ئەنجامی پشکنینی کۆرۆنایان پۆزەتیڤە".

ئەنجامی پشکنینی کۆرۆنا لەماوەی 24 بۆ 48 کاتژمێر دەردەچێت، لە تاقیگەکەی هەولێر 14 کارمەند بە شیفتی جیاواز 24 کاتژمێر کاردەکەن.

موحسین دزەیی دەڵێ "کارمەندەکانمان مۆراڵیان بەرزە، ئەگەر وانەبن ناتوانین کارەکەی خۆمان بەتەواوی بکەین".