بەوێنە.. یەکەم گەشتی ئاسمانی لەنێوان ئیسرائیل و ئیمارات

K24 - هەولێر

دوای ئەوەی بە نێوندگیریی ئەمەریکا پەیوەندییەکانی ئیسرائیل و ئیمارات بەرەو ئاساییبوون هەنگاویان نا، ئەمڕۆ (دووشەممە، 31-8-2020) یەکەم گەشتی ئاسمانیی بازرگانی لەنێوان ئەو دوو وڵاتە ئەنجامدرا.

جارید کۆشنەر، راوێژکاری کۆشکی سپی کە سەرۆکایەتی شاندێک دەکات بۆ ئاساییکردنی پەیوەندییەکانی ئیسرائیل و ئیمارات، هیوای خواست یەکەم گەشتی بازرگانیی راستەوخۆی نێوان ئیسرائیل و ئیمارات، ببێتە سەرەتای قۆناغێکی نوێ لە رۆژهەڵاتی ناوەڕاست.

کۆشنەر ئەو لێدوانەی لە فڕۆکەخانەی بن گۆریۆن لە نزیک تەلئەڤیڤ دا، پێش ئەوەی ئەو فڕۆکەیەی گەشتی پێدەکرد، کە لە جۆری بۆینگ 737 بوو و سەر بە کۆمپانیایەکی ئیسرائیلییە، یەکەم هەنگاو بەرەو جێبەجێکردنی رێککەوتنی ئاساییکردنی پەیوەندییەکانی نێوان ئیسرائیل و ئیمارات بنێت.