ئاگر لە سنووری حەوت گوندی باکووری کوردستان کەوتەوە
ئاگر لە سنووری گوندێکی پارێزگای شرنەخی باکووری کوردستان کەوتەوە و دوای کۆنترۆڵکردنی ئاگرەکە، دووبارە بەهۆی ڕەشەباوە سەری هەڵدایەوە و دەیان دۆنم زەوی لە دەشتیایی و باخ و بێستانەکانی سنووری حەوت گوندی سووتاند.
یەکشەممە، 23ی حوزەیرانی 2024، لە باکووری کوردستان ئاگر لە گوندی تەپەجیکی سەر بە شارۆچکەی ئیدیلی پارێزگای شرنەخ کەوتەوە، بە هەوڵی خەڵکی ناوچەکە و تیمەکانی بەرگریی شارستانیی ئاگرەکە کۆنترۆڵ کرا، بەڵام بەهۆی کاریگەریی توندیی با، ئاگرەکە چەند کاتژمێرێک دواتر تەشەنەی سەند و ئەمجارە گوندەکانی دەوروبەریشی گرتەوە.
ئەمە لە کاتێکدایە پێنجشەممەی ڕابردوو ئاگرێکی گەورە لە چەند لایەکی دارستانێکی نێوان سنووری پارێزگاکانی دیاربەکر و ماردینی باکووری کوردستان کەوتەوە و بە گوتەی فه‌خره‌ددین قۆجه، وه‌زیری ته‌ندروستی توركیا به‌هۆی ئاگرەکەوە 14 کەس مردوون و 78 کەسی دیکەش بریندار بوون، ئەمە جیا لە زەرەر و زیانە ماددییەکانی بەر سروشت و باخ و دارستانەکانی ناوچەکە کەوتبوو.
لەلایەکی دیکەوە یڵماز تونچ، وەزیری دادی تورکیا لە تۆڕی ئێكس ڕایگه‌یاند، لەسەر بڕیاری سەرۆکایەتیی داواکاری گشتیی شارۆچکەی چنار لێکۆڵینەوە لە ڕووداوی ئاگرکەوتنەوەکە دەستی پێ کردووە.
