ئابووری

پرۆژەی ڕووناکی بەردەوامە لە فراوانبوون

کوردستان پرۆژەی ڕووناکی کارەبای 24 کاتژمێری

جێگری بەڕێوەبەری نووسینگەی سەرۆک وەزیرانی هەرێمی کوردستان ڕایگەیاند: بەهۆی پرۆژەی ڕووناکی کە ئامانج لێی دابینکردنی کارەبای 24 کاتژمێرییە، لە سەرتاسەری هەرێمەکە زیاتر لە 700 مووەلیدە کوژێنراونەتەوە.

یەکشەممە 4ـی ئایاری 2025، عەزیز ئەحمەد، جێگری بەڕێوەبەری نووسینگەی سەرۆک وەزیرانی هەرێمی کوردستان، لە هەژماری خۆی لە تۆڕی کۆمەڵایەتی ئێکس، لەبارەی پرۆژەی ڕووناکی نووسیویەتی: دابینکردنی کارەبای 24 کاتژمێری لە چوارچێوەی پرۆژەی ڕووناکی، لە قۆناغی ئێستا هاوتای ئەوەیە 125 هەزار ئۆتۆمبیڵ لە شەقامەکان هەڵگیرابن.

ئاماژەی بەوە کرد، بەهۆی پرۆژەکەوە 700 مووەلیدە لە سەرتاسەری هەرێمی کوردستان کوژێنراونەتەوە، ئەمە جگە لەوەی هێشتا نزیکەی شەش هەزار و 300 دانەی تریش ماون هەڵبگیرێن.

لەلایەکی دیکەوە، پرۆژەی ڕووناکی، لە میانی پۆستێکدا لە تۆڕی کۆمەڵایەتی ئێکس، ئاماری هاوبەشانی پرۆژەی کارەبا 24 کاتژمێرییەکەی لە سەرتاسەری هەرێمی کوردستان بڵاو کردەوە.

بە گوێرەی زانیارییەکانی پرۆژەی ڕووناکی، تا ئێستا  لە هەولێر 530 هەزار، لە سلێمانی 40 هەزار و لە دهۆک 30 هەزار هاوبەش هەن.

کابینەی نۆیەمی حکوومەتی هەرێمی کوردستان، چەندین پرۆژەی گرنگیی خزمەتگوزاریی لە سەرتاسەری هەرێمی کوردستان خستووەتە جێبەجێکردن، لە نێویاندا کارەبای 24 کاتژمێری، کە بە پرۆژەی ڕووناکی ناسراوە، پرۆژەکە سەرەتا لە هەولێر جێبەجێ کرا دواتر گەیشتە هەر یەکە لە پارێزگاکانی دهۆک، سلێمانی و بەمزووانەش دەگاتە هەڵەبجە.

ڕۆژی پێنجشەممە، 17ـی تشرینی یەکەمی 2024، لە کاتی سەردانیدا بۆ گەڕەکی شادی لە شاری هەولێر، سەرۆک وەزیران مەسرور بارزانی، پرۆژەی ڕووناکیی ڕاگەیاند، کە ئامانج لێی دابینکردنی کارەبای 24 کاتژمێرییە بۆ سەرتاسەری هەرێمی کوردستان.

 
 
 
کوردستان24 دیجیتاڵ میدیا ,
Fly Erbil Advertisment