چین: ترەمپ بەنزین بە ئاگری شەڕی نێوان ئیسرائیل و ئێراندا دەکات

سێشەممە، 17ـی حوزەیرانی 2025، وا چاکون، گوتەبێژی وەزارەتی دەرەوەی چین، لە کۆنگرەیەکی ڕۆژنامەوانیدا ڕایگەیاند، دۆناڵد ترەمپ، سەرۆکی ئەمەریکا، تۆمەتبارە بەوەی لە پەرەسەندنی ململانێکانی نێوان ئیسرائیل و ئێران، بەنزین بە ئاگردا دەکات؛ پاش ئەوەی داوای دەستبەجێ چۆڵکردنی تارانی کرد.

گوتەبێژی وەزارەتی دەرەوەی چین گوتیشی: "پێداکردنی بەنزین بە شەڕ، هەڕەشە و زیادکردنی فشارەکان یارمەتیدەر نابێت بۆ هێورکردنەوەی دۆخەکە. بەڵکو دەبێتە هۆی پەرەسەندن و فراوانکردنی ململانێکان."

بەرەبەیانی ڕۆژی هەینی، 13ـی حوزەیرانی 2025، . ئیسرائیل بە 200 فڕۆکەی جەنگی و سەدان درۆن هێرشی کردە سەر ئێران  و لە ئەنجامدا چەندان فەرماندە و زانای ئەتۆمی ئێرانی کوژران. لەو هێرشەدا کە بەناوی "هەستانەوەی شێر" کرا، 300 شوێنی ئێران بۆمباران کرا.

 ئێرانی لە وەڵامی هێرشەکانی ئیسرائیل، ئۆپەراسیۆنی "بەڵێنی ڕاستگۆی 3"ـی ڕاگەیاند.