وردەکاریی ڕێککەوتنە نوێیەکەی بەریتانیا و فەرەنسا لەبارەی پەنابەرانی نایاسایی

وڵاتانی ئەورووپا ڕێکارەکانیان دژی پەنابەران توندتر دەکەن و پەنابەرانیش ڕووبەڕووی هێرشی ڕەگەزپەرستانە دەبنەوە.

دلۆڤان عیمادەددین، پەیامنێری کوردستان24 لە لەندەن ڕایگەیاند، وڵاتانی ئەوروپا، بەتایبەتی بەریتانیا و فەرەنسا، ڕێکارەکانیان دژی پەنابەران توندتر کردووە و ڕێککەوتنێکی نوێیان بۆ سنووردارکردنی هاتنی پەنابەران واژۆ کردووە.

ڕێککەوتنە نوێیەکەی نێوان بەریتانیا و فەرەنسا

پەیامنێری کوردستان24 ڕایگەیاند، بەریتانیا و فەرەنسا ڕێککەوتنێکی نوێیان واژۆ کردووە بۆ کەمکردنەوەی ژمارەی ئەو پەنابەرانەی بە شێوەی نایاسایی لە ڕێگەی نۆکەندی ئینگلیزەوە دەپەڕنەوە. بەپێی ڕێککەوتنەکە، هەر پەنابەرێک بە شێوەیەکی نایاسایی بگاتە بەریتانیا، لە ماوەی 14 ڕۆژدا دیپۆرتی فەرەنسا دەکرێتەوە. لە بەرامبەردا، فەرەنسا ڕێگە بە هەمان ژمارەی پەنابەران دەدات کە پەیوەندی خێزانییان لە بەریتانیا هەیە، بە شێوەیەکی یاسایی بچنە ناو خاکی ئەو وڵاتەوە.

جێبەجێکردنی ئەم بڕیارە لە 24ی مانگی هەشتەوە دەست پێدەکات. لە قۆناغی یەکەمدا، بڕیارە هەفتانە 50 پەنابەر کە بە نایاسایی گەیشتوونەتە بەریتانیا، دیپۆرتی فەرەنسا بکرێنەوە.

بارودۆخی پەنابەران لە بەریتانیا

پەیامنێری کوردستان24 ئاماژەی بەوەدا، ژیانی پەنابەران لە بەریتانیا زۆر سەخت بووە. ئەو پەنابەرانەی کە داوای مافی پەنابەرییان کردووە و چاوەڕێی وەڵامن، ڕووبەڕووی کێشەی نیشتەجێبوون بوونەتەوە. خاوەن ماڵەکان بەهۆی نەبوونی کار و داهاتی جێگیر، خانوویان پێنادەن. ئەمەش وایکردووە کە زۆربەی پەنابەران لە هۆتێلەکاندا نیشتەجێ بن، کە بارودۆخیان زۆر خراپە و ڕووبەڕووی هێرشی ڕەگەزپەرستانە دەبنەوە.

هەروەها، پەنابەران بڕە پارەیەکی زۆر کەمیان پێدەدرێت کە هەفتانە 30 پاوەندە، بەشی پێداویستییە سەرەکییەکانیان ناکات، ئەمەش وایکردووە هەندێکیان بە شێوەی نایاسایی کار بکەن بۆ دابینکردنی بژێوی ژیانیان.

کاردانەوەی ڕێکخراوەکانی مافی مرۆڤ

دلۆڤان عیمادەددین ئاماژەی بەوەش کرد، هەرچەندە بڕیارە لە 24ی مانگەوە دەست بە دیپۆرتکردنەوە بکرێت، بەڵام ئەگەر پارێزەران و ڕێکخراوەکانی مافی مرۆڤ سکاڵا لەسەر بڕیارەکە تۆمار بکەن، ڕەنگە جێبەجێکردنی دوابکەوێت. حکوومەتی بەریتانیا دەیەوێت پێش ئەوەی پارێزەران دەرفەتیان هەبێت، پرۆسەی دیپۆرتکردنەوەکە جێبەجێ بکات.