كەركووك...خۆپێشاندان لە بەردەم كۆمپانیای نەوتی باكوور دەستی پێكرد
K24 - كەركووك:
كەمێك پێش ئێستا لە بەرامبەر دواكەوتنی مووچەكانیان و چەند گلەیەكی دیكەیان، كارمەندانی كۆمپانیای نەوتی باكوور لە كەركووك خۆپێشاندانیان رێكخست.
پەیامنێری (كوردستان24) لە شاری كەركووك رایگەیاند: "كەمێك پێش ئێستا كارمەندانی كۆمپانیای نەوتی باكوور لە كەركووك خۆپێشاندانێكیان لە بەردەم كۆمپانیاكە رێكخست و چەند پەیامێكیان ئاراستەی بەرپرسانی كۆمپانیاكە دەكەن".
ژمارەیەك لە خۆپێشاندەرانی كۆمپانیاكە بۆ (كوردستان24) ئاماژەیان بۆ ئەوەكرد: "پێشتر مووچەكانیان لە كاتی خۆی دابەش دەكرا، بەڵام ئێستا چەندین ھەفتە بەسەر وادەی خۆی تێدەپەڕێت و مووچە دابەش ناكەن".
كارمەندانی كۆمپانیای نەوتی باكوور لە كەركووك ئەوەشیان خستەڕوو: "دەرماڵەی ھاندان و سوودیان لە كارمەندانی ئاسایی بڕاوە، لە بەرامبەردا خەرجكردنی دەرماڵەی ناردنی بەرپرسان سەفەری ناوخۆ و دەرەوەی وڵات بەردەوامە".