شیرین عەلی: ھونەر داهێنانێکی مرۆییە کە مەبەست و ئاکامی  ئاراستەکردنی جوانییە

K24 – هەولێر :

ئەکتەر و دەرهێنەر شیرین عەلی، لە دیمانەیەکدا لەگەڵ کوردستان24، باس لە کارە هونەرییەکانی و ئەزموونی خۆی لە هونەری سینەما و شانۆ دەکات و دەڵێت: ھونەر داهێنانێکی مرۆییە کە مەبەست و ئاکامی  ئاراستەکردنی جوانییە.

شیرین لەبارەی گرنگیی شانۆوە گوتی: نان و شانۆم بدەرێ ،گەلێکی ھۆشیارت دەدەمێ، دەڵێت: ئەمە دەلالەتێکی زۆر روونە، شانۆ لە رێگەی تێڕوانینی هونەرمەند بۆ ژیان و چڕبوونەوەی لە  رەهەندە کۆمەڵایەتیەکان و ھەوڵدان بۆ هەلومەرجێکی بونیادنەرتر ،دەتوانێت هۆشیارانە لەسەر زۆربەی کۆمەڵگا کاریگەری دادەنێت، بۆ پێناسەکردنی هونەرمەندی راستەقینەش، پێی وابوو ،ھونەرمەندی راستەقینە ئەو کەسەیە لەگەڵ  قۆناغەکەی خۆیدا دەژێت و دابڕاو نیە لە کارەسات و مەینەتیەکانی کۆمەڵگەکەی.

لەبارەی توانای خۆی لەنێوان شانۆ و سینەکامدا، شیرین ئاماژە بەوە دەکات، ھونەر بە گشتی دەربڕی زاتی مرۆڤە، بینەر بڕیار لەسەر تواناکان دەدات.

 پرسی پاراستنی مافی هونەرمەندان، بابەتێکی دیکەی نێوان شیرین و کوردستان24 بوو، ئەو پێی وابوو، ھیچ یاسایەک نیە مافی ھونەرمەند پارێزراو بکات، یاخود بودجەی ھونەری بەشێوەیەکی باش رێکبخات، ئاماژەی بەوەشکرد.ھونەر داهێنانێکی مرۆییە کە مەبەست و ئاکامی  ئاراستەکردنی جوانییە، دەڵێت: من وابەستەم بەو تیۆرەی ھیگڵەوە کە ھونەر ھەڵقوڵاوی رۆحی مرۆڤە، بەڵکو حاڵەتێکی رۆحیە لە رێگەی ھەست و ویژدانەوە خۆی وێنا دەکات.

لەبارەی نەبوونی بینەری سینەما و شانۆش، شیرین دەڵێت:  لەبەر ئەوەی ھونەر نەبووە بە کولتوور لای ئێمە، تا ئێستا نەتوانراوە برەو بە بەبازاریکردنی کارە ھونەرییەکان بدرێت و بینەر رابکێشینە نێو ھۆڵی نمایشەوە، لە سەروو ئەمانەشەوە کاری باش بکرێت بینەری باشی دەبێت، وەک لەم چەند ساڵەی پێشوو  ھەندێک کاری باشمان بینی کە بینەری باشی ھەبوون چ لە شانۆ یاخود لە سینەمادا.

شیرین عەلی وەک ئەکتەر لە بواری شانۆ و سینەمادا کاری کردووە، کاری دەرهێنانی لە بواری فیلمدا کردووە، لەگەڵ ئەوەشدا لە 10 کاری شانۆیی بەشداریکردووە.

 شیرین ئاماژە بەوە دەکات، کاری دەرهێنانی بۆ 4  فیلمی فیکشن و 2 فیلمی دۆکیۆمێنتاری کردووە، لە 8 فیلمی کورت و درێژدا وەک ئەکتەر رۆڵی بینیوە، وەک یاریدەدەری دەرھێنەر و تەکنیک، لە زیاتر لە 35 فیلم ب لە دەرەوە و ناوەوەی وڵات بەشداریی کردووە، بڕوانامەی بەکالۆریۆس لە ھونەری نواندن و بڕوانامەی ماستەری لە فیلمسازی لە وڵاتی بەریتانیا هەیە.