فههمی سلێمان: پێویسته ههموو لایهنه دڵسۆزهكانی كوردستان ههمان ههڵوێستی پارتی وهربگرن
K24 - هەولێر:
شرۆڤهكارێكی سیاسی ئاماژه بهوه دهكات، ههموو لایهنه دڵسۆز و خهمخۆرهكانی كوردستان پێویسته ههمان ههڵوێستی پارتی دیموكراتی كوردستان وهربگرن. دهشڵێت، ئهوانهی له رابردوو ئۆپۆزسیۆن بوون ئهمڕۆ له عێراق له دهسهڵاتدان، ههوڵ دهدهن عێراق ببنهوه خاڵی سفر.
ئهمڕۆ (دووشهممه 18ـی ئاداری 2024) فههمی سلێمان، شرۆڤهكاری سیاسی تایبهت به كوردستان24 رایگهیاند، پڕۆسهی سیاسی ئهمڕۆ له عێراقدا له بهردهم دووڕیانكێكدایه كه ئایا دهوڵهتێكی فیدڕاڵی و دیموكراسییه، یان میراتگری ههمان كولتووری رابردوو و سهد ساڵ لهمهوبهری رژێمهكانی پێش خۆیهتی و گوزارشت له دهوڵهتێكی دیكتاتۆری و ناوهندیی دهكات؟
فههمی سلێمان ئاماژهی بهوهش كرد، هاوبهشهكانی كورد كه له ئۆپۆزسیۆندا بوون ئهمڕۆ بهرامبهر به كورد و مافهكانی پاشگهز بوونهتهوه كه عێراقی نوێی لهسهر پێكهێنراوه.
ئهو شرۆڤهكاره سیاسییه باسی لهوهش كرد، ئهوانهی له رابردوو ئۆپۆزسیۆن بوون ئهمڕۆ له عێراق له دهسهڵاتدان، رۆژ به رۆژ پاشهكشه به پڕۆسهی دیموكراتی دهكهن و ههوڵ دهدهن عێراق ببنهوه خاڵی سفر.
ناوبراو گوتیشی، بڕیارهكهی ئهمڕۆی پارتی دیموكراتی كوردستان له جێی خۆی بوو، بهڵام دهبوو ههر له ساڵی 2007ـوه كاتێك ماددهی 140 وهك خۆی جێبهجێ نهكرا، ئهم جۆره ههڵوێستانه وهربگیرایه.
فههمی سلێمان به پێویستیشی زانی ههموو لایهنه دڵسۆز و خهمخۆرهكانی كوردستان وهك وهفایهك بۆ خوێنی شههیدان و قوربانیدان و كیمیابارانكراوان و ئهنفالكراوان ههمان ههڵوێستی پارتی دیموكراتی كوردستان وهربگرن.
ئەمڕۆ دووشەممە، 18-03-2024، مەکتەبی سیاسیی پارتی دیموکراتی کوردستان بەیاننامەیەکی لەبارەی دۆخی ئێستای عێراق، پەیوەندییەکانی هەولێر و بەغدا، هەڵبژاردنی پەرلەمانی کوردستان، بڕیارەکانی دادگای فیدراڵی و چەند پرسێکی دیکە بڵاوکردەوە.
مەكتەبی سیاسی پارتی دیموكراتی كوردستان دەڵێت، "لایەنەکانی هاوپەیمانی ئیدارەی دەوڵەت دەخەینە بەردەم بەڕپرسیارێتیی نیشتمانی لە جێبەجێنەکردنی دەستوور و تەواوی خالەکانی رێککەوتنی سیاسی و ئیداریی پێکهێنانی کابینەی ئێستای حکومەتی عێراق بە سەرۆکایەتیی محەممەد شیاع سوودانی، بەپێچەوانەشەوە ناتوانین بەردەوام بین لە پڕۆسەی سیاسی دا".
مەكتەبی سیاسی پارتی ئاماژەی بەوەش کردووە، "لە سۆنگەی تێگەیشتنمان لە پێگە و بەرپرسیارێتی مێژووییمان لە پاراستنی مافە ڕەواكانی گەلی كوردستان و سیستەمی دیموكراسی و فيدراڵی عێراق، هەروەها ڕەوایی نەدان بە هەڵبژاردنێكی نا دەستووری و نا دیموكراسی، و وەستانەوە لە بەرامبەر سەرجەم ئەو پێشێلکاریانەی دەستوور کە لەلایەن دادگای باڵای فیدراڵییەوە بەرامبەر هەرێمی کوردستان و دامەزراوە دەستورییەکانی ئەنجام دەدرێت بەگشتی، و سەپاندنی هەموارە نادەستوریەكانی یاسای هەڵبژاردنی خولی شەشەمی پەرلەمانی کوردستان بەتایبەتی، بە بەرژەوەندی گەل و نیشتمانەکەمانی دەزانین كە پارتیمان نەچێتە ژێر باری پەسەندکردنی بریاری نادەستووریی و سیستەمێکی سەپێنراو لە دەرەوەی ئیرادەی گەلی هەرێمی كوردستان و دامەزراوە دەستوورییەکانی و بەشداری هەڵبژاردنێک نەكات کە بە نایاسایی و نادەستوری و لەسایەی سیستەمیکی سەپێنراودا بەڕێوەبچێت".