هاوپه‌یمانی فه‌تح سزادانی ئێران ره‌تده‌كاته‌وه
K24 - هه‌ولێر:
په‌رله‌مانتارێكی هاوپه‌یمانی فه‌تح كه هادی عامری، ئه‌مینداری گشتی رێكخراوی به‌در سه‌رۆكایه‌تی ده‌كات، رایگه‌یاند: "ئه‌و سزایانه ره‌تده‌كه‌ینه‌وه كه ئه‌مه‌ریكا به‌سه‌ر ئێراندا سه‌پاندوویه‌تی و ته‌ئكید ده‌كه‌ینه‌وه به‌شێوه‌یه‌كی كه‌م نه‌بێت هیچ كاریگه‌رییه‌ك له‌سه‌ر عێراق درووست ناكات".
فازڵ عه‌بد شنین، په‌رله‌مانتاری هاوپه‌یمانی فه‌تح ده‌ڵێت: "ئه‌و سزایانه‌ی ویلایه‌ته یه‌كگرتووه‌كانی ئه‌مه‌ریكا به‌سه‌ر ئێراندا سه‌پاندوویه‌تی، هیچ كاریگه‌رییه‌كی له‌سه‌ر عێراق نابێت و ئاسانه".
هه‌روه‌ها ده‌ڵێت: "به دڵنیاییه‌وه حكوومه‌تی عێراق، ئه‌و سزایانه‌ی ئه‌مه‌ریكا به‌سه‌ر ئێرانی برامان سه‌پاندوویه‌تی ره‌تده‌كاته‌وه، چونكه په‌یوه‌ندی ئابووری و بازرگانیمان هه‌یه جگه له په‌یوه‌ندی سیاسی جێگیر".
بەگوێرەی هەواڵێکی رۆژنامەی نیویۆرک تایمز، ئەمڕۆ کاتژمێر 4:30ی پاشنیوەڕۆ بە کاتی هەولێر، مایک پۆمپیۆ، وەزیری دەرەوە و ستیڤن منوشین، وەزیری گەنجینەی ئەمەریکا کۆنگرەیەکی رۆژنامەوانی سازدەکەن و وردەکانی سزاکانی سەر ئێران دەخەنەڕوو.
ئەو سزایانەی ئەمەریکا کە لە ساڵی 2015 لەسەر ئێران هەڵگیرا گەڕێندرانەوە، جیا لە سزا کۆنەکان، واشنتن سزای بەسەر 300 دامەزراوەی نەوت، کۆمپانیای گواستنەوە، بانک و سیستمی دڵنیایی ئێرانی سەپاند.
لە دوای کشانەوەی لە رێککەوتنامەی ئەتۆمی، دۆناڵد ترەمپی سەرۆکی ئەمەریکا، ئەو رێککەوتنامەیەی بە "خراپترین" رێککەوتنامەی ئەمەریکا ناوبرد. پۆمپیۆش چەند جارێک دووپاتیکردۆتەوە کە "تووندترین" سزا بەسەر ئێراندا دەسەپێنن.
ئەو 12 مەرجەی وەزارەتی دەرەوەی ئەمەریکا بۆ هەڵگرتنی سزاکانی سەر ئێران دایناوە:
1- رێگا بە ئاژانسی نێودەوڵەتی وزەی ئەتۆمی بدرێت کە تەواوی زانیارییەکان لەسەر چالاکی سەربازیی پرۆگرامە ئەتۆمییەکانی پێشوو بزانێت و دەبێت ئێران بە تەواوی دەست لەو جۆرە چالاکییانە هەڵبگرێت.
2- واز لە پیتاندن بهێنێت و هەرگیز هەوڵی دووبارە بەکارهێنانی پلوتۆنیۆم نەدات و تیشکدەرەوە ئاوییەکانی دابخات.
3- رێگا بە ئاژانسی نێودەوڵەتی وزەی ئەتۆمیی بدرێت بچێتە سەرانسەری پێگە ئەتۆمییەکان لە ئێران.
4- کۆتایی بە زیاکردنی مووشەکە دوورهاوێژەکانی بهێنێت و گەشەدان بە سیستمی مووشەکی ئەتۆمیی رابگرێت.
5- هەموو هاووڵاتیانی ئەمەریکا و هاوپەیمانانی ئەمەریکا ئازاد بکرێن لە زیندان.
6- کۆتایی بە پشتگیری گروپە تیرۆرستییەکانی وەک حزبوڵڵا، حەماس و گروپە جیهادییەکان لە رۆژهەڵاتی ناوەڕاست بهێنێت.
7- هەموو هێزەکانی لە سووریا بکشێنێتەوە.
8- واز لە پشتگیریکردنی تاڵیبان و گروپە تیرۆرستییەکانی ئەفغانستان و ئەلقاعیدە بهێنێت.
9- کۆتایی بە هەڕەشەکانی بەرامبەر بە هاوپەیمانەکانی ئەمەریکا بهێنێت کە وڵاتانی سعودییە، ئیمارات و ئیسرائیلیش دەگرێتەوە، هەروەها هێرش لە رێگای پۆستی گەیاندن و ئینتەرنێت نەکات.
10- رێز لە سەروەری عێراق بگرێت و رێگا بدات میلیشیا شیعەکان هەڵبوەشێندرێنەوە.
11- دەبێت سوپای قودس دەست لە پاڵپشتیکردنی باڵەکانی لە تەواوی جیهان هەڵبگرێت.
12- پشتگیری حوسییە یاخییەکانی یەمەن نەکات و هەوڵی بەرقەرارکردنی ئاشتی و سەقامگیری لە یەمەن بدات.