پرۆژە یاسا رێکخستنا میدیا ئەلکترۆنی، خواندنەک و پێشنیار بۆ رێزداران ل پەرلەمانێ کۆردستانێ
پەرلەمانێ کۆردستانێ خواندنا ئێکێ بۆ یاسا رێکخستنا میدیا ئه‌لکترۆنی ل ھەرێما کۆردستانێ کر، سەرەرای دەست خۆشیێ ل ڤێ پێنگاڤا پێدڤی و گرنک، ل بیرا پەرلەمانتارێن ھێژا و پەرلەمانێ رێزدار دئینین ل ھەرێما کۆردستانێ میدیا ب گشتی دلاوازیەکا یاسایی و ئەکادیمی دا دبۆریت، 980 دەزگەھێن راگەھاندنێ یێن تۆمارکری و دەستوردایی ھەنە، نێزیکی 133 تەلەفزیونێن ئاسمانی و نافخویی، 145 رادیویان و ب ڤان ھژماران ژ لایێ ھژمارێ ڤە ئانکۆ "چەندایەتیێ" مە چ کێماسی نینە بەلکی ژ ھژمارا کەنالێن راگەھاندنێ یێن کۆمارا فرەنسا پترن، لێ ژ لایێ ناڤەرۆکێ ڤە مە کێم و کاسیێن زۆر ھەنە، رۆژانە ب دەھان بابەتێن بێ کوالێتی و بێ ژێدەرێن بنەجھ و راست و دروست پەخش و بەلاڤ دبن. نەک ھەر ئەڤە بەلکۆ ژلایێ سیاسی، ئابۆری، کۆمەلایەتی و دەروونی ڤە میدیا ئێک ژ ئەگەرێن بھێزە کو ڤەقەتیان و لاوازی پەیدا ببن.
ب گشتی ل ھەرێما کۆردستانێ مە نە بتنێ پێدڤی ب یاسا رێکخستنا میدیا ئه‌لکترۆنی ھەیە ژبەر کو ئەم یێن دبۆشاییەکا یاسایی و ئیتێکی یا کارێ راگەھاندنێ دا، یاسا کارپێکری یا ژمارە 35 و راستڤەکری ل سالا 2008 چارەسەریا ئاریشێن رۆژنامەڤانی ل ھەرێما کۆردستانێ ناکەت، چۆنکی ئەم ھێشتا نزانین سیستەمێ بنەجھێ سەرەدەریا دگەل راگەھاندنێ چیە؟ ل وەلاتێن دونیا یێن پێشکەفتی بتنێ ب ھیڤیا یاسایێ ڤە نەھێلایە بەلکو ئەنجوومەنێن چاڤدێری و سەرپەرشتیا لڤینا میدیایی ھەنە... ب گشتی بۆ بەرێزان پەرلەمانێ کۆردستانێ پێشنیار دکەین ڤی بابەتی ب ھیڤیا خۆ ب تنێ ڤە نەھێلن بەلکۆ بابەتەکێ فرە رەھەندە لەوما ھژمارەکا شەھرەزا دبیاڤێن پەیوەندیدار دا بانگھێشت بکەنە پەرلەمانی و دیتن و بوچونێن وان زۆر ب جدی دیاسایێ دا جێ بە جێ بکەن.
نەک ھەر ئەڤە پێدڤیا مەیە بەلکۆ ھەم وەکو پێدڤی و ھەم ژی وەکو چارەسەری ئەڤان پێشنیاران ئاراستەیی ھەوە یێن رێزدار دکەین:
1- پێدڤیا ھەرێما کۆردستانێ ب دووبارە دەرێخستنا رەشنڤیسێ یاسا ئەنجوومەنێ راگەھاندنێ ھەیەکو دناڤا ئەرشیفێ پەرلەمانێ کۆردستانێ یێ سالا 2011 ھەیە ژ لایێ ھەر سێ مامۆستایێن زانکۆیێ، د.رضوان باديني، د.مغديد سه پان، د.ره حيم سورخى هاتبوو نڤيسين و پێشکێشکرن خواندنا ئێکێ بۆ ھاتبووکرن و گەھشت بوو قوناغا دان و ستاندن و ب راوستیایی مایەڤە.
2- سەرپەرشتی و چاڤدێریا لڤینا میدیایی ب رێکا دامەزراوێن رێکخستی یێن حکۆمەتێ و ھەروەسا ب رێکا رێکخراوێن نە حکۆمی بھێتەکرن ئەم دبینین رۆژانە ژ ئەگەرێ شاشیێن میدیایێ ب دەھان زانیاریێن شاش و بابەتێن نە شایستە دھێنە بەلاڤکرن و دەرئەنجام ژی کۆشتن، خۆ کۆشتن و قوربانیێن دەست درێژی و چاندنا تۆڤێ کەرب و کینێ و .... ھەنە.
3- نە بتنێ یاسا رێکخستنا راگەھاندنا ئه‌لکترۆنی بەلکۆ یاسا رێکخستنا رادیۆ و تەلەفزیونان ژی پێدڤیە کو رەھەندێن نشتیمانی و مرۆڤایەتی ھەبن ب مخابنی ڤە لاوازیەکا مەزن دڤی لایی دا ھەیە و سەر ئەنجام بەرھەمێ رادیو و تەلەفزیونا ھێشتا دکەڤیتە د راگەھاندنا ئەلکترونی دا.
ب کۆرتی؛ ئاریشا میدیایێ ل ھەرێما کۆردستانێ بتنێ ب یاسا کارێ رۆژنامەڤانی، و یاسا رێکخستنا راگەھاندنا ئه‌لکترۆنی چارەسەر نابیت بەلکۆ ب دروستکرنا ئەنجوومەنێ راگەھاندنی، و دام و دەزگەھێن چاڤدێری و سەرپەرشتیا لڤینا میدیایی دێ چارەسەر بیت.