DAIŞê enbarên genim ên Hesekê vala kirin

K24-Hesekê

Welatiyên bajarê Hesekê ragihandin ku çekdarên DAIŞê hemû genim û alavên enbaran ji navenda Sebah El-Xêr a başurê bajêr veguhestine bajarokê Şedadê û navçeyên parêzgeha Dêrazorê.

Li gor agahiyên çend welatiyên wê deverê ku, nexwestin navê wan were eşkere kirin, bi çavê xwe dîtine ku DAIŞê bi alîkariya grûpên taybet hemû alavên mekanîkî û elektrîkê yên enbarên genim vekirine û bi rêya barhilgran ber bi navçeyên Dêrazorê û bajarokê Şedadê birine.

Welatiyan eşkere kir ku ji bilî wan alavan DAIŞê genimê wan enbaran jî veguhestiye wan herêmên di bin kontirola xwe de, bi armanca firotina wan kelûpelan.

Di dema dawî de û piştî armanckirina jêderên aboriya wê DAIŞ rûbirûyê krîzeke darayî bûye, ev yek jî bûye sedam ku rêxistina navborî meaşên çekdarên xwe kêm bike û li jêderên nû bigere wek firotina kelûpelan.