Li rojavayê Kurdistanê 3 kesên din bi Koronayê canê xwe ji dest dan

Navenda Nûçeyan (K24) – Li rojavayê Kurdistanê û herêmên Rêveberiya Xweser, 52 kesên din bi vîrûsa Koronayê ketin û 3 kesan jî bi wê vîrûsê cane xwe ji dest dan.

Hevserokê Desteya Tenduristiyê ya Rêveberiya Xweser Dr. Ciwan Mistefa ragihand, 3 kesan bi vîrûsa Koronayê canê xwe ji dest dan. Haletên mirinê wiha ne: 1 kes li Hesekê, kesek li Qamişlo û 1 kes li Tirbesipiyê.

Dr. Ciwan Mistefa ragihand jî, 52 haletên nû yên pêketina bi vîrûsa Koronayê hatin tomarkirin. 

Haletên hatine tomarkirin: 17 kes li Hesekê, 16 kes li Dêrikê, 5 kes li Qamişlo, 5 kes li Girkê Legê, 3 kes li Dirbêsiyê, 1 kes li Amûdê, 1 kes li Til Koçer û 6 kes li Rimêlan û 3 kes li Reqayê.

Bi vî awayî, hejmara kesên li rojavayê Kurdistanê wek hilgirên vîrûsa koronayê hatine tomarkirin gihiştiye 1670 kesan, ji wan 67 kesan jî canê xwe ji dest dane.

Dr. Ciwan Mistefa diyar kir jî, bi başbûna 8 pêketiyên Koronayê, hejmara kesên ji wê vîrûsê baş bûne gihîştiye 437 kesan.

Demek e hejmara pêketiyên Koronayê li rojavayê Kurdistanê zêde dibin. Di wê derbarê de duhî Berdevka Desteya Tendirustiyê Rojîn Ehmed ji K24ê re ragihand, pabendnebûna welatiyan bi rênimayên xweparêziyê, sedema sereke ya zêdebûna belavbûna Koronayê ye.