Hejmara parlamenterên HDP daket 55'an

K24 – Navenda Nûçeyan

Parlamentertiya Parlamenterên HDP Faysal Sarîyildiz û Tûba Hezer, bi hinceta neberdewamiya Parlamentoyê hatin daxistin. Bi vê biryarê, hejmara parlamenterên HDP daket 55'an.

Parlamentoya Tirkiyê, bi armanca dengdana ser endamtiya Parlamenterê HDP'ê yê Şirnexê Faysal Sarîyildiz û Parlamentera Wanê Tûba Hezer îro civiya.

Parlamenterên HDP Hezer û Sarîyildiz payîza 2016'ê ji Tirkiyê derketibûn û dengdana daxistina parlamentertî jiber neberdewamiya kar hate kirin.

Parlamentertiya Sarîyildiz, hemberî 29 dengên Nexêr bi 328 dengên Belê hat daxistin. Parlamentertiya Tûba Hezer jî hember 20 dengan bi 324 dengan hat daxistin. Yekemcar e ku, parlamentertî jiber neberdewamî tê daxistin.

Piştî biryarê, Cîgira Serokê Koma HDP Fîlîz Kerestecîoglu da xuyakirin, daxistina parlamentertiyê, deqeke reş ya dîroka Parlamentoya Tirkiyê ye û got, Serokwezîrê berê Ehmed Davudoglu jî berdewamiya karê parlamentertiyê nake, lê derbarê wî de tiştek naye kirin.

Bi daxistina parlamentertiya Hezer û Sarîyildiz, hejmara parlamenterên HDP daket 55'an. Hê berê jî parlamentertiya Hevseroka HDP Fîgen Yuksekdag û Parlamentera Diyarbekirê Nursel Aydogan hatibû daxistin. Her weha Îro bi rêznameya nû ya parlamentoyê, jiber nexwendina sûnda parlamenteriyê, Leyla Zana nikare ji mafên parlamentertiyê sûd werbigre, lê parlamentertiya wê berdewam dike.