Hahn: Pirsgîrêka aboriya Tirkiye, siyasî ye

K24 – Navenda Nûçeyan

Berpirsiyarê Berferehkirinê yê Komisyona Ewrûpayê Johannes Hahn destnîşankir ku: “Aloziya aborî li Tirkiye di encama metodên siyasî yên desthilatê ye. Ev alozî jî bi alîkariya maddî û diravî ji bo Tirkiye nayê çareserkirin”.

Johannes Hahn di hevpeyvîna xwe ligel rojnameya Die Welt a Almanî de anî ziman: “Pirsgîrekên aborî ku li Tirkiye peyda bûn e, ew pirsgîrêk in, ên ku ew bi xwe bûn e sedem. Pêwîst nake em destwerdanê di van pirsan de bikin”.

Serokomarê Tirkiye sibe seredana Almanya dike û ligor şîrovekaran Erdogan dê daxwaza alîkariya aborî û krediyê ji Almanya bike.

Lê, ligor Hahn: “Ji bo başbûn a rewşa aborî siyasetek diravî ya zanyar, Bank a Navendî ya serbixwe, parastina bîngehên demokrasiyek bihêz dikare bibe alîkar. Erkê van reforman jî, li stûyê desthilata siyasî ye”.

Hahn herweha diyarkir ku, Ewrûpa dixwaze Tirkiye welatek ewle û serkeftî be, lê dive reform li vî welatî pêk bên. Wê demê de şirketên Ewrûpayî dîsa rêya Tirkiye hilbijêrin.

C.B