May û Trump ji bo sizadana berpirsên êrîşa kîmawî lihev dikin
K24 – Navenda Nûçeyan
Serokwezîra Brîtanyayê û Serokê Amerîka li ser bersiveke navdewletî û sizadana aliyên berpirs ên çekê kîmawî li Sûriyê bikar tînin lihev kirin.
Di pêwendiyeke telefonî de Serokwezîra Brîtanyayê Theresa May bi Serokê Amerîka Donald Trump re li ser sizadana berpirsên êrîşa kîmawî li Sûriyê lihev kir, wek amajeyeke ne rasterast ku dê bi Amerîka re beşdarî operasyoneke leşkerî bibe.
Theresa May di pêwendiya bi Trump re diyar kir, divê aliyê tawanber ê êrîşa kîmawî li ser Dûmayê were şermezarkirin û pêwîst e civaka navdewletî bersivekê bide, ji bo bihêzkirina qedexeya navdewletî li ser çekê kîmawî.
Li ser pirsa ku eger heye Brîtanya tevlî Amerîka bibe heger operasyoneke leşkerî li Sûriyê encam da, Theresa May got: “Divê berpirs bêne sizadan”
Tê zanîn Serokwezîra Brîtanyayê di pêwendiya telefonî ya bi Serokê Fransayê re jî li ser heman tiştî lihev kiribû.
Roja 7ê vê mehê, firokeyên rêjîma Sûryê bi tundî êrîşî bajarê Dûma yê Xûta Rojhilatê Şamê kirin û li gorî raporên pizîşkî di wê êrîşê de, rêjîmê çekên kîmawî bikar anî û di encamê de bêtirî 100 welatiyên sivîl di nav de zarok û jin canê xwe ji dest dan û bi sedan jî birîndar bûn.
Serokê Amerîka Donald Trump jî ragihandibû, derbarê êrîşa kîmawî li ser Xûtaya Rojhilat di demên nêzîk de biryarên girîng derdike.
S. B