ديمه‌نى وێرانكارى ته‌قينه‌وه‌كانى ناوچه‌ى سه‌در ببينه‌

K24 – هه‌ولێر:

ئه‌مڕۆ ديمه‌نى ئه‌و وێرانكاريانه‌ بڵاوكرانه‌وه‌، كه‌ به‌ هۆى ته‌قينه‌وه‌كانى شه‌وى رابردووى حوسه‌ينييه‌كى سه‌در به‌سه‌ر ناوچه‌كه‌دا هاتوون و ده‌يان خانووبه‌ره‌ى هاووڵاتيان ته‌ختى زه‌وى بوونه‌.

شه‌وى رابردوو، له‌ حوسه‌ينييه‌يه‌كى ناوچه‌ى (سه‌در)ى خۆرهه‌ڵاتى به‌غدا دوو ته‌قينه‌وه‌ رووياندا و له‌ ئاكامدا (10) هاووڵاتى گيانيان له‌ده‌ستدا و (19)ى ديكه‌ بريندار بوون.

به‌ گوێره‌ى زانيارييه‌كان، ته‌قينه‌وه‌كان له‌ ناو ئه‌مبارێكى چه‌ك و ته‌قه‌مه‌نى ناو حوسه‌ينييه‌كه‌ روويانداوه‌ و به‌ هۆيه‌وه‌ ته‌واوى ئه‌مباره‌كه‌ ته‌قيوه‌ته‌وه‌ و وێرانكارييه‌كى گه‌وره‌ى لێكه‌وتووه‌ته‌وه‌، جگه‌ له‌ زيانه‌ گيانييه‌كان.

خه‌ڵكى زيانلێكه‌وتووى ناوچه‌كه‌ به‌شێكى له‌ سه‌ر شه‌قامه‌كان رۆژيان كرده‌وه‌ و به‌شێكيشيان به‌ ده‌م كوژرا و برينداره‌كان روويان له‌ نه‌خۆشخانه‌كان كرد.

موقته‌دا سه‌در، رابه‌رى ره‌وتى سه‌در، بڕياريداوه‌ ليژنه‌يه‌كى به‌دواداچوون بۆ ده‌رخستنى راستى رووداوه‌كه‌ پێكبهێنێت و له‌ ماوه‌ى سێ رۆژدا ئه‌نجامى به‌دواداچوونيان بخه‌نه‌ڕوو.

سه‌رچاوه‌: سۆمه‌رييه‌ نيوز

ئ.ر