سەرۆكی ھەرێمی كوردستان و وەزیری بەرگریی ئەمریكا کۆدەبنەوە
K24- ھەولێر
ئاشتۆن كارتەر، وەزیری بەرگریی ئەمریكا كەمێك پێش ئێستا بە رێگەی فڕۆكەخانەی نێودەوڵەتیی ھەولێر گەیشتە ھەرێمی كوردستان و بڕیارە لەگەڵ سەرۆكی ھەرێمی كوردستان كۆببنەوە.
دوای نیشتنەوەی فڕۆكە سەربازییەكەی لە فڕۆكەخانەی ھەولێر كارتەر و شاندی یاوەری لە لایەن قوباد تاڵەبانیی، جێگری سەرۆكی حكوومەتی ھەرێمی كوردستان و كەریم شنگالیی، وەزیری ناوخۆ و وەزیری پێشمەرگە بە وەكالەت پێشوازی لێكرا.
بەپێی زانیارییەكانی (كوردستان24) ئەمڕۆ مەسعوود بارزانیی، سەرۆكی ھەرێمی كوردستان و ئاشتۆن كارتەر، وەزیری بەرگریی ئەمریكا كۆدەبنەوە و رەوشی ناوچەكە و شەڕی داعش تاوتوێ دەكەن.
لەم سەردانەیدا كارتەر لەگەڵ راوێژكار و بەرپرسانی سەربازیی ھەرێمی كوردستان كۆدەبێتەوە.
وەزیری بەرگریی ئەمریكا دوێنێ بە سەردانێكی چاوەڕواننەكراو گەیشتە بەغدا و لەگەڵ بەرپرسانی باڵای عێراق كۆبووەوە، ئەو سەردانەی كارتەر دوای ئەوە هات كە باراك ئۆباما، سەرۆكی ئەمریكا رایگەیاند وڵاتەكەی ھێرشەكانی بۆسەر چەكدارانی داعش چڕتر دەكاتەوە.