کۆنگرەی لوتکەی بەغدا دەستیپێکرد

K24 – بەغدا

کەمێک پێش ئێستا بە بەشداری ژمارەیەک لە سەرۆک و نوێنەری وڵاتان کۆنگرەی لوتکەی بەغدا بۆ (هەماهەنگی و هاوبەشی) دەستی بە کارەکانی کرد.

لە سەرەتای کۆنگرەکەدا مستەفا کازمی سەرۆک وەزیرانی عێراق وتارێکی پێشکەش کرد و رایگەیاند: "ئەم کۆنگرەیە ئێستا لە کاتێکی هەستیار و مێژوویی بەڕێوەدەچێت، چونکە کردنەوەی دەرگایەکە بەڕووی پەیوەندییەکانی دەرەوە و دراوسێکانمان، عێراق رووبەڕووی چەند ئاستەنگێک بووەتەوە، بەڵام بەردەوام هەنگاومان هاویشتووە، بۆ بەرەنگاربوونەوەی ئاستەنگەکان کە تیایدا سەربکەوین، بۆ ئەوەی کارێک بکەین کاریگەی لەسەر هەموو عێراقییەکان هەبێت و داهاتوویەکی رۆشنتر بۆ عێراق و دراوسێکانمان دابین بکەین".

گوتیشی: "بەستنی ئەو کۆنگرەیە لە بەغدا خاڵێکی زۆر گرنگە، ئەمە پیشاندانی روئیای عێراقە، بۆ مامەڵەکردن لەگەڵ وڵاتانی دیکە لەسەر بنەمای هەماهەنگی و تەواوکاری و دەستوەرنەدان لە کاروباری یەکتر، هەروەها بەهێزکردنی زمانی دیالۆگ و کارکردنی پێکەوە و پاراستنی بەرژەوەندی هاوبەش. کاتێک کە ئەم کابینەی حکومەتمان وەرگرت روئیامان وابوو کە عێراق رۆڵی پێشەنگ ببینێ لە ناوچەکەدا لە رێگەی بەهێزکردنی پرەنسیپی هاوکاری و ئاسایش و برایەتی. دوای چوندین ساڵ ململانێ و بەربەست گەیشتوینەتە ئەو خاڵەی کە عێراق رۆڵێک بگێڕێت کە ببێتە مایەی سەقامگیری لە ناوچەکە، کۆنگرەکە نیشاندانی ئەو رۆڵەیە".

گوتیشی: "دەکرێ خاکی عێراق بەکاربهێنرێت بۆ پێکەوە کارکردن، نەک بۆ ململانێکردنی نێودەوڵەتی، لەو روانگەیەوە عێراق لە دراوسێکانی دەڕوانێت لەسەر بنەمای هاوکاری و هەماهەنگی، نەک بنەمای ململانێ".

کازمی راشیگەیاند: "عێراق چەندین قۆناغی جیاوازی بینیوە لە ململانێ و شەڕ، بەڵام ئێمە هەنگاوی زۆرمان بڕیوە و پەیوەندیی دۆستایەتیمان توندتۆڵ کردووە و هەوڵمانداوە ئەو پەیوەندیانە بۆ بنیات نانەوەی ژێرخانی ئابووری عێراق بەکاربهێنین، کە لە رابردوودا زیانی گەورەی بەرکەوتووە، لە چەند دەیەی رابردوودا عێراق تووشی گرفتی گەورە بووە. گەلی عێراق پێویستی بە چاکسازی و بنیات نانەوە هەیە لە هەموو بوارێکدا، بۆیە داوا لە دۆستەکانمان دەکەین هاوکارمان بن، بۆ ئەوەی بتوانین زاڵبین بەسەر ئەو چاکسازیانەی گرتوومانەتە بەر".

سەرۆک وەزیرانی عێراق ئەوەشی خستەڕوو: "پێویستە هەموومان رووبەڕووی تیرۆر ببینەوە، بۆ بەرەنگاربوونەوەی هێزێکی تیرۆرستی وەک داعش بە هاوکاری لەگەڵ براکانمان و دۆستەکانمان و لەگەڵ هاوپەیمانی نێودەوڵەتی کارمان کرد، سوپاسیان دەکەین، تیرۆر بووەتە مایەی هەڕەشە لەسەر هەموو وڵاتان نەک بە تەنیا عێراق، زیانی گەورەی لە هەمووان داوە، تائێستاش تیرۆر دەیەوێت ببێتە بەربەست بۆ رووخاندنی عێراق، بەڵام ئێمە هەموو هەوڵەکانمان خستووەتەگەڕ بۆ رێگریکردن، بنبڕکردنی تیرۆ هەنگاوی سەرەتاییە بۆ داهاتووێکی باشتر".

کازمی، راشیگەیاند: "ئێستا عێراق بەرەو هەڵبژاردن دەڕوات، داوامان لە کۆمەڵگەی نێودەوڵەتییە هاوکار و پاڵپشتی عێراق بکەن، لە رێگەی تیمی چاودێری و هاوکاری، بۆ ئەوەی هەڵبژاردنێکی سەرکەوتوو ئەنجامبدەین، خەڵکی عێراق دەیەوێت بە دیموکراسیانە نوێنەرانی خۆیان هەڵبژێرن".

دواتر ئیمانوێل ماکرۆن، سەرۆکی فەرەنسا لە وتەیەکدا ئاماژەی بەوەدا: "ئەم کۆنگرەیە کۆیکردینەوە، بۆ ئەوەئ بتوانین هاوکاری و هەماهەنگی زیاتر لەنێوانمان هەبێت. ئەم لوتکەیە خاڵێکی گرنگی هەیە ئەویش ئەوەیە کە ئیرادەیەک هەیە بۆ پێکەوە کارکردن، دەبێ هەموومان هەوڵبدەین بۆ سەروەری و ئاشتی و سەقامگیری عێراق، لێرەوە ئامادەیی خۆمان دەردەبڕین بۆ خزمەتکردنی زیاتری عێراق، فەرەنسا بەرپرسایەتی خۆی جێبەجێ دەکات، بۆ هاوکاریکردنی عێراق لە رووبەڕووبوونەوەی هێرشەکانی داعش، لە چوارچێوەی هاوپەیمانی نێودەوڵەتی، فەرەنسا پابەندە لە رووبەڕووبوونەوەی تیرۆر و گەڕانەوەی سەقامگیری بۆ گەلی عێراق".

ئاماژەی بەوەشدا: "دەبێ وانە لە رابردوو وەربگرین، هەر بەربەستێک لە عێراق هەبێت کاریگەری لەسەر هەموو جیهان دەبێت، بۆیە پێویستە هەموو هاوکارییەکی عێراق بکەین، بۆ ئەوەی هەنگاوێکی دیکە بهاوێژێت، ئێمە دەزانین هەڵبژاردنی داهاتووی عێراق هەنگاوێکی زۆر گرنگە، هاوکات کۆمەڵێک هەنگاو هەن بۆ چاکسازی و ریفۆرم".

ماکرۆن، جەختیکردەوە: "دەبێ هەموومان پاڵپشتی عێراق بین، بەڵام بە مانای دەستێوەردان نا، بەڵکو دەبێ رێز لە سەروەری عێراق بگرین و پاڵپشتیان بکەین، بۆ ئەوەی عێراق لەسەر پێی خۆی بوەستێت".

سەرۆکی فەرەنسا، گوتی: "پرسی سەرەکی ئەم کۆنگرەیە پرسی دابینکردنی سەقامگیریی و پێکەوە کارکردنە بۆ سەرەتایەکی بۆ ژێرخانی ئابووریەکی باشتر، ئومێد دەکەم ئەم کۆنگرەیە ببێتە هۆکار کە دەستنیشانی خاڵە کێشە لەسەرەکان بکەین و هەمووان هاوکاری عێراق بین،و کۆمەڵگەی نێودەوڵەتی رازی بکەین هاوکاری دارایی پێشکەش بە عێراق بکرێت".