چەکدارێکی داعش لەجیاتی بەراز بە تەڵەی جوتیارانەوە بوو

K24 – کەرکووک

خەڵکی گوندێکی سنووری کەرکووک لە رێگەی تەلی کارەباوە، تەڵە بۆ بەراز دادەنێن، بەڵام لە بری بەراز چەکدارێکی داعش پێوەبوو.

شەوی پێنجشەممەی رابردوو، لەنێوان گوندی سێبیران و شەحەلی کۆن لە سنووری شارەدێی سەرگەڕانی سەر بە شارۆچکەی دووبز لەخۆرئاوای کەرکووک، سوپای عێراق لە کامێرای چاودێرییەوە چەند چەکدارێکی داعش دەبینن، دوای جوڵاندنی هێز و گەمارۆدانی شوێنەکە شەڕ و رووبەڕووبوونەوە دروستبووە، دواتر هێزەکەی سوپای عێراق شوێنەکە بەجێدەهێڵن، ئێوارەی رۆژی هەینی 10/9/2021، لەلایەن جوتیارانی ناوچەکەوە تەرمی چەکدارێکی داعش دەبینرێت، دوای ئاگادارکردنەوەی هێزە ئەمنییەکانی ناوچەکە تەرمەکە رەوانەی پزیشکی دادوەری دەکەن لە کەرکووک.

سەرچاوەیەکی ئەمنی لە پۆلیسی سەرگەڕان بە کوردستان24ی راگەیاند: "تەرمەکەی داعش هیچ شوێنەوارێکی گولـلەی پێوەنەبووە، بۆیە دوای پشکنین و لێکۆڵینەوە دەرکەوتووە کارەبا گرتوویەتی".

روونیکردەوە: "جوتیارانی سنوورەکە بە شەوان لە رێگەی تەلی کارەباوە کێڵگە کشتوکاڵییەکانیان دەپارێزن دەکەن، بە مەبەستی راوکردن و دوورخستنەوەی بەراز، کە بەشەوان زیان بە بەروبوومەکانیان دەگەیەنن، بەڵام لە بری بەراز چەکدارێکی داعش پێوە بووەو گیانی لەدەستداوە".