مەسرور بارزانی و مستەفا کازمی لە کۆبوونەوەدان
K24 – هەولێر
مەسرور بارزانی، سەرۆکی حکومەتی هەرێمی کوردستان و مستەفا کازمی سەرۆک وەزیرانی عێراق لە هەولێر لە کۆبوونەوەدان.
بەگوێرەی زانیارییەکانی کوردستان24، ئەمڕۆ چوارشەممە 8/12/2021، مەسرور بارزانی، سەرۆکی حکومەتی هەرێمی کوردستان لە فڕۆکەخانەی نێودەوڵەتی هەولێر پێشوازی لە مستەفا کازمی سەرۆک وەزیرانی عێراق و شاندێکی یاوەری کرد.
هەر بەپێی زانیارییەکان، جومعە عێناد، وەزیری بەرگری عێراق و شاندێکی باڵای سەربازی عێراق یاوەری مستەفا کازمین.
کوردستان24 زانیویەتی، لە کۆبوونەوەی نێوان سەرۆکی حکومەتی هەرێمی کوردستان و سەرۆک وەزیرانی عێراق، تاوتوێی بارودۆخی عێراق لە دوای هەڵبژاردن و هێرشەکانی ئەم دواییەی داعش لە ناوچە کوردستانییەکان و تەقینەوەکەی بەسرا دەکرێت.
هەماهەنگی زیاتر لەنێوان هێزی پێشمەرگەی کوردستان و سوپای عێراق، بۆ بەرپەرچدانەوەی هەموو هێرشێکی تیرۆریستانی داعش و لەناوبردنی یەکجارەکی و پاراستنی خەڵكی ناوچە کوردستانییەکانی دەرەوەی ئیدارەی هەرێم، یەکێک دەبێت لە تەوەرە سەرەکییەکانی کۆبوونەوەی نێوان مەسرور بارزانی و مستەفا کازمی.