29 پۆستی باڵا له وه‌زاره‌تی پێشمه‌رگه ئاڵوگۆڕی پێكرا
K24 - هەولێر
وه‌زاره‌تی پێشمه‌رگه ئاشكرای ده‌كات واژوو له‌سه‌ر ئاڵۆگۆڕی 29 پۆستی باڵا كرا.
وه‌زاره‌تی پێشمه‌رگه‌ی حكومه‌تی هه‌رێمی كوردستان راگه‌یه‌ندراوێكی بڵاوكرده‌وه، تێیدا هاتووه، له‌دوای گۆڕانكارییه‌كانی هه‌ریه‌ك له پۆستی سه‌رۆكی ئه‌ركان و ئه‌مینداری گشتی وه‌زاره‌تی پێشمه‌رگه، ئه‌مڕۆ (دووشه‌ممه 20ـی حوه‌زیران / یۆنیۆی 2022)، (شۆڕش ئیسماعیل) وه‌زیری پێشمه‌رگه، واژۆی له‌سه‌ر ئاڵوگۆڕی 29 پۆستی له وه‌زاره‌تی پێشمه‌رگه‌دا كرد.
هه‌روه‌ها له راگه‌یه‌ندراوه‌كه‌ی وه‌زاره‌تی پێشمه‌رگه‌دا هاتووه، ئه‌م بڕیاره وه‌ك هه‌نگاوێكی دیكه‌ی گۆڕانكارییه‌كانی ناو وه‌زاره‌ت و به‌ره‌و پێشبردنی زیاتری پڕۆسه‌ی چاكسازی ئه‌نجامدراوه.
وه‌زاره‌تی پێشمه‌رگه ئه‌وه‌شی خسته‌ڕوو، له‌دوای بڕیاری خانه‌نشینكردن و جێبه‌جێكردنی، ده‌رفه‌تی یاسایی و ئیداری بۆ هێنانه پێشه‌وه‌ی خوێنی تازه و كاراكته‌ری نوێ دروستبووه.
هه‌روه‌ها ئه‌وه‌ش روونكراوه‌ته‌وه، ئاڵۆگۆڕكردنی پۆسته‌كان له ئه‌نجامی پسپۆڕی و شاره‌زایی له‌بواره‌كاندا بووه، وه‌ك قورسترین ئه‌ركی ناو كارنامه‌ی چاكسازی و به‌رنامه‌ی وه‌زاره‌ت، له‌میانی كابینه‌ی نۆیه‌مدا جێبه‌جێ كراوه.