له‌باره‌ی سەرهەڵدانەوەی داعش گوتەبێژی یەکێتی ئەوروپا وه‌ڵامی کوردستان24 دەداتەوە
K24 - برۆكسل/ بارزان حه‌سه‌ن:
له‌باره‌ی سه‌رهه‌ڵدانه‌وه‌ی داعش، گوته‌بێژی یه‌كێتی ئه‌وروپا دڵنیایی ده‌داته عێراق و هه‌رێمی كوردستان، كه له هاوكارییه‌كانیان به‌رده‌وام ده‌بن.
ئەمڕۆ (سێشەممە 3ـی كانوونی دووه‌م/یه‌نایه‌ری 2023)، یەکەم رۆژی کرانەوەی دەرگای دامودەزگاکانی یەکێتی ئەوروپا بوو لە برۆکسل، لە یەکەم کۆنگرەی رۆژنامەوانی لەساڵی نوێدا، نەبیلە مەسرالی گوتەبێژی یەکێتی ئەوروپا بۆ کاروباری دەرەوەی ئه‌وروپا، وه‌ڵامی کوردستان24 دەداتەوە و رایگه‌یاند، ئەوان بەردەوامن لە ئەندامبوون لە هاوپەیمانی نێودەوڵەتی دژی داعش و هەروەها بەرده‌وام دەبن لە هاوکاری ماددی و مەعنەوی بۆ تێکشکاندنی داعش لەعێراق و هەرێمی کوردستان.
گوتەبێژەکەی یەکێتی ئەوروپا ئاشکراشیكرد، یەکێتی ئەوروپا بڕی 100 ملیۆن یۆرۆی تەرخانکرووە بۆ دووبارە ئاوەدانکردنەوەی ئەو شوێنانەی لە دەستی داعش ئازادکراون.
بۆ ئاوەدانکردنەوە، کاری مرۆیی، ئاوارەکان، پەروەردە و رووبەرووبوونەوەی داعش، لەساڵی 2014 تاکو ئێستا، به بڕی زیاتر لە یەک ملیار یۆرۆ، هاوکاری عێراق کراوە.
لەماوەی رابردوودا یەکێتی ئەوروپا رایگەیاندبوو، بۆ ساڵی 2023 بەبڕی 4 ملیۆن یۆرۆ هاوکاری عێراق دەکات، ئەم بڕە پارەیەش زیاتر بۆ دابینکردنی پێداویستیە سەرەتاییەکانە بۆ چینی هەژار، کەمدرامەت و ئاوارەکان.