ئیسرائیل هێرشی مووشەکی کردە سەر دیمەشق
K24 - هەولێر
سوپای سووریا بڵاویکردەوە، شەوی رابردوو ئیسرائیل هێرشی مووشەکی کردووەتەوە سەر دیمەشقی پایتەختی وڵاتەکەیان.
لە راگەیەندراوێکدا سوپای سووریا ئاماژەی بەوەداوە، ئیسرائیل لە بەرزاییەکانی جۆلانەوە باشووری رۆژئاوای شاری دیمەشقی پایتەختی کردووەتەوە ئامانج و بەهۆیەوە سەربازێک بە سەختی برینداربووە.
باسی لەوەشکردووە، سیستەمی بەرگری ئاسمانی سوپا ژمارەیەک مووشەکی ئیسرائیلییان تێکشکاندووە.
میدیاکانیش باس لەوەدەکەن، ئیسرائیل لە هێرشەکەی شەوی رابردوویدا، پێگەیەکی هەڵگرتنی چەک و تەقەمەنی سوپای پاسدارانی ئێرانی لە ناوچەی کیسوەی دیمەشق کردووەتە ئامانج.