ئیلۆن مەسک گۆڕانکاریەکی نوێ لە تویتەر رادەگەیەنێت
K24 – هەولێر:
ئیلۆن مەسک، خاوەنی تۆڕی کۆمەڵایەتی ئێکس (تویتەری پێشوو) رایگەیاند، لە داهاتوویەکی نزیکدا تایبەتمەندی پەیوەندیکردنی دەنگی و ڤیدیۆیی بۆ پلاتفۆڕمەکە زیاد دەکرێت بەبێ ئەوەی پێویستی بە ژمارەی مۆبایل هەبێت.
رۆژی پێنجشەممە (31ـی 8ـی 2023)، ئیلۆن مەسک، خاوەنی تۆڕی کۆمەڵایەتی ئێکس (تویتەری پێشوو) لە پۆستێکدا لە هەژماری تایبەتی خۆی لە ئێکس رایگەیاند، پەیوەندیکردنی دەنگی و ڤیدیۆیی لە زووترین کاتدا بۆ بەکارهێنەرانی تۆڕی کۆمەڵایەتی ئێکس بەردەست دەبێت، کە لەسەر سیستمەکانی (IOS، ئەندرۆید، ماک و کۆمپیوتەر) کاردەکات.
مەسک ئاماژەی بەوەشکردووە، کە زیادکردنی ئەو تایبەتمەندییە پێویستی بە ژمارەی مۆبایل نییە تابتوانی لە رێگەی ئێکسەوە پەیوەندی دەنگی و ڤیدیۆیی بەکاربهێنیت و ئەو پلاتفۆڕمە خۆی ناونیشانێکی جیهانی کاریگەرە بۆ پەیوەندیکردن.
Video & audio calls coming to X:
— Elon Musk (@elonmusk) August 31, 2023
- Works on iOS, Android, Mac & PC
- No phone number needed
- X is the effective global address book
That set of factors is unique.
ئەم گۆڕانکارییە نوێیە دوای ئەوە دەێت، کە ماوەیەک بەر لە ئێستا ئیلۆن مەسک ئاشکرایکرد کە بە هەوڵ بۆ لادانی تایبەتمەندی بلۆککردن لە ئێکس لابدات و ئەو تایبەتمەندییەشی بە بێ مانا وەسفکرد و رایگەیاندووە، تەنیا بژاردەی راگرتنی ناردنی نامەی راستەوخۆ بۆ بەکارهێنەران بەردەست دەبێت.
ئەم هەنگاوەی مەسک بۆ گۆڕانکاریی لە تۆڕی کۆمەڵایەتی ئێکس، بەشێک لە رکابەرییەکانی دێت لەگەڵ کۆمپانیای مێتا کە خاوەندارییەتی پلاتفۆڕمەکانی فەیسبووک، ئینستاگرام، سرێدز و وەتس ئەپ دەکات و هەوڵی دۆزینەوەی جێگرەوە بۆ بەکارهێنەرانی ئێکس دەدات لەبری بەکارهێنانی پلاتفۆڕمەکانی دیکە.
مەسک لە دوای کڕینی تویتەر، گۆڕانکاری جۆراوجۆری لەنێو تویتەر ئەنجامداوە، لەوانە دوورخستنەوەی ژمارەیەکی زۆری کارمەند، پێدانی (سەحە شینەکە) بە بەکارهێنەرانی تویتەر لەبەرانبەر بڕێك پارەی مانگانە، هەروەها گۆڕینی لۆگۆی تویتەر بۆ ماوەیەکی کاتی لە باڵندەوە بۆ سەگ.
هاوکات لە کۆتایی مانگی تەمموزی رابردوو، ئیلۆن مەسک، ملیاردێر و دامەزرێنەری هەردوو کۆمپانیای سپەیس ئێکس و تێسلا و خاوەنی تویتەر، ناو و لۆگۆی تویتەر گۆڕی بۆ ئێکس.
دوای ململانێیەکی یاسایی لەنێوان ئیدارەی تویتەر و ئیلۆن مەسک لەسەر مامەڵەی کڕینی تویتەر، دواجار له 27ـی ئۆكتۆبه‌ری 2022، ئیلۆن مه‌سك، دەوڵەمەندترین پیاوی جیهان ناچاربوو تۆڕی کۆمەڵایەتی تویتەر بە 44 ملیار دۆلار بکڕێتەوە، كه مانگانه زیاتر له 450 ملیۆن به‌كارهێنه‌ری چالاكی هه‌یه.