ئەنجومەنی نوێنەران: دەبێت حکومەت پەلە بکات لە راگرتنی پێشێلکارییەکانی ئێران

K24 - هەولێر

سەرۆکایەتی ئەنجومەنی نوێنەرانی عێراق لە بەیاننامەیەکدا رایگەیاند، شەوی رابردوو چەند شوێنێکی پارێزگای هەولێر بووە ئامانجی هێرشە مووشەکییە بالیستییەکانی ئێران، ئێمە لەبەرامبەردا ئیدانەی ئەو دەستدرێژییە تاوانکارییانە دەکەین، کە بەداخەوە ژمارەیەک هاووڵاتی سڤیلی بێتاوان کە ژن و منداڵیان تێدایە بوونە قوربانی.

هەر لەراگەیەندراوەکەدا هاتووە، داوا لە حکومەتی فیدراڵی و فەرماندەی گشتی هێزە چەکدارەکان دەکەین پەلە بکەن و دەستوەردان بکەن بۆ راگرتنی ئەو هێرشانە و پاراستنی سەروەری عێراق و دووبارە نەکردنەوەی ئەو پێشێلکارییانەی کە لەلایەن وڵاتانی دراوسێوە دەکرێت.

ئاماژە بەوەشکراوە، ئێمە وەک سەرۆکایەتی ئەنجومەنی نوێنەران، فەرمانمان بە پێکهێنانی لیژنەیەکی هاوبەشی ئاسایش و بەرگری و کاروباری دەرەوە کرد بۆ زانینی وردەکارییەکانی هێرشەکە و ئەو زیان و گیان لەدەستدانانەی کە بە خەڵکی مەدەنی گەیشتووە.

ئەمە لە کاتێکدایە نزیکەی کاتژمێر 11:30ـی خولەکی شەوی دووشەممە، 15-01-2024، بە چەندین مووشەک و فڕۆکەی بێ فڕۆکەوان هێرشکرایە سەر ناوچەیەکی جیاوازی شاری هەولێر. دواتر سوپای پاسدارانی ئێران بەرپرسیارییەتی هێرشەکانی لە ئەستۆ گرت.

دواتر ئەنجوومەنی ئاسایشی هەرێمی کوردستان لە راگەیەندراوێکدا ئەوەی خستەڕوو: "کاتژمێر 11:30ـی شەوی 15 لەسەر 16ی کانوونی دووەمی 2024، سوپای پاسدارانی ئێران بە چەندین مووشەکی بالیستیکی چەند ناوچەیەکی سڤیلنشینی هەولێری بۆردوومان کرد."

وەکو ئەوەی لە راگەیەندراوەکەی ئەنجوومەنی ئاسایشی هەرێمی کوردستاندا ئاماژەی پێ دراوە، بەهۆی هێرشەکەوە، "چوار هاووڵاتیی سڤیل شەهید و 6 کەسی دیکەش بریندار بوون، کە ڕەوشی تەندروستیی هەندێ لە بریندارەکان ناجێگیرە".

لای خۆیەوە، مەسرور بارزانی، سەرۆکوەزیرانی هەرێمی کوردستان لە پۆستێکی تۆڕی کۆمەڵایەتیی ئێکس (تویتەری پێشوو)، داوای لە حکومەتی فیدراڵی کرد "هەڵوێستی توندیان بەرامبەر بەم پێشێلکارییەی دەکرێتە سەر سەروەریی عێراق و بەتایبەتی هەرێمی کوردستان هەبێت".

سەرۆکوەزیرانی هەرێمی کوردستان هەروەها داوا لە کۆمەڵگەی نێودەوڵەتی دەکات "لەسەر ئەو ستەمکارییەی بەرامبەر بە خەڵکی کوردستان دەکرێت بێنە دەنگ". گوتیشی، "لە رۆژانی داهاتوودا، لەگەڵ کۆمەڵگەی نێودەوڵەتی لە پەیوەندیی بەردەوامدا دەبین لەپێناو کۆتاییهێنان بەم هێرشە دڕندانانەی دەکرێنە سەر خەڵکی بێ تاوانی کوردستان".