بەنگین رێکانی: تا ئێستا بڕیارەکانی دادگای فیدراڵی بە فەرمی نەگەیشتووەتە حکومەت
K24 – هەولێر:
وەزیری ئاوەدانکردنەوە و نیشتەجێکردنی فیدراڵی دەڵێت: تا ئێستا بڕیارەكانی دادگای فیدڕاڵی بە شێوەیەكی فەرمی نەگەیشتووەتە دەستی حكومەت و ئەوەی ھەیە تەنیا لە راگەیاندنەكانەوە باسكراوە.
ئەمڕۆ یەکشەممە (25ـی شوباتی 2024) بەنگین رێكانی، وەزیری ئاوەدانكردنەوە و نیشتەجێکردنی فیدراڵی تایبەت بە کوردستان24ـی راگەیاند، حکومەتی عێراق لە ئێستادا بە فەرمی بڕیارەکانی دادگای فیدراڵی بەدەست نەگەیشتووە، هەر کاتێک بڕیارەکان گەیشتن ئینجا گفتوگۆی لەسەر دەکرێت و قسە لەسەر جێبەجێكردنی میكانزمەكانی دەكرێت.
وەزیری ئاوەدانكردنەوە و نیشتەجێکردنی عێراق، گوتیشی: هەواڵی گەیشتنی بڕیارەکان تەنیا لە راگەیاندنەکان باسی لێوە کراوە و هیچ شتێکی فەرمی لە ئێستادا لە ئارادا نییە.
رۆژی چوارشەممە، (21ـی شوباتی 2024) دادگای باڵای فیدراڵیی عێراق بۆ یەکلاییکردنەوەی ئەو سکاڵایانەی لە دژی مووچەی فەرمانبەر و مووچەخۆرانی هەرێمی کوردستان و یاسای تایبەت بە هەڵبژاردنی پەرلەمانی کوردستان تۆمارکراون، کۆبووەوە.
لە کۆبوونەوەکەدا، دادگای فیدراڵی بڕیاریدا، کە نابێت لەمەودوا قەرز بدرێتە حکومەتی هەرێمی کوردستان بۆ ئەوەی مووچەی فەرمانبەرانی دابەش بکات و پێویستە حکومەتی عێراق پابەندبێت بە پێدانی مووچەی فەرمانبەرانی هەرێمی کوردستان.