هونه‌رمه‌ندی كورد سه‌عید یوسف له ته‌مه‌نی 73 ساڵیدا كۆچی دوایی كرد
K24- هه‌ولێر:
هونه‌رمه‌ندی كوردی به‌ناوبانگی رۆژئاوای كوردستان، سه‌عید یوسف له ته‌مه‌نی 73 ساڵیدا له نه‌خۆشخانه‌یه‌كی شاری ئیستانبۆڵ له توركیا كۆچی دوایی كرد.
هونه‌رمه‌ندی ناوبراو كه به میری ئامێری میوزیكی بوزق ناسرا بوو، خه‌ڵكی شاری قامشلۆی رۆژئاوای كوردستانه و له ساڵی 1947 له دایك بووه.
له ساڵی 1973 له‌گه‌ڵ هه‌ردوو هونه‌رمه‌ندی كورد محه‌مه‌د شێخۆ و محه‌مه‌د عه‌زیز شاكر گروپی هونه‌ری نه‌ورۆزیان دامه‌زراند.
میری بوزق، سه‌عید یوسف خاوه‌ن مێژوویه‌كی ده‌وڵه‌مه‌ندی هونه‌ره و وه‌ك یه‌كه‌م كه‌س داده‌نرێت، كه ئامێری میوزیكی بوزقی هێناوه‌ته ناوچه‌ی جزیره‌ی رۆژئاوای كوردستان.
سه‌عید یوسف به درێژایی ژیانی هونه‌ری خۆی ژماره‌یه‌كی زۆری خه‌ڵات و دروشمی جیهانی به‌ده‌ستهێناوه.
نازناوی "میری بوزق" له لایه‌ن بوزق ژه‌نی ناوداری سووریا، محه‌مه‌د عه‌بدولكه‌ریمه‌وه پێ به‌خشراوه.
H.B