بەوێنە؛ ئازادکردنی سەدان زیندانیکراوی بزووتنەوەی تاڵیبان

K24 - هەولێر

لەکاتێکدا داواکارییەکان بۆ هاندانی تاڵیبان لەپێناو درێژکردنەوەی ماوەی ئاگربەست زیاد دەبن، سەدان زیندانیکراوی بزووتنەوەی تاڵیبان لەلایەن حکومەتی ئەفغانستان ئازادکران.

پێشتر بزووتنەوەی تاڵیبان رایگەیاندبوو لە ماوەی سێ رۆژی جەژندا ئاگربەست دەبێت، وەکو نیشاندانی نیازپاکییەکیش حکومەتی ئەفغانستان دوێنێ سێشەممە (26-5-2020) سەدان زیندانیی ئەو بزووتنەوەیەی ئازادکرد.

حکومەتی ئەو وڵاتە رایگەیاند نیازییەتی نزیکەی 900 زیندانیکراوی تاڵیبان لەسەرانسەری وڵات ئازاد بکات، کە 600ـیان لە زیندانی باگرامن، ئەو زیندانەی دەکەوێتە نزیک کابوول و ناوێکی خراپی هەیە.

بزووتنەوەی تاڵیبان وەکو بەشێک لە ئاگربەستەکە داوای ئازادکردنی دوو هەزار زیندانیکراوی کردبوو، ئازادکردنی ئەو زیندانییانەش وەڵامدانەوەی حکومەتی ئەفغانستانە بۆ داواکارییەکانیان.