ئه‌ردۆغان: ئه‌وروپاییه‌كان بێ لێكۆڵینه‌وه په‌نجه‌ی تۆمه‌ت بۆ موسڵمانان درێژ ده‌كه‌ن
K24 – هه‌ولێر:
سه‌رۆكی كۆماری توركیا، ره‌جه‌ب ته‌یب ئه‌ردۆغان رایگه‌یاند، هه‌ر كرده‌وه‌یه‌كی توندوتیژی رووبدات، ئه‌گه‌ر موسڵمانێك بیكات، راسته‌وخۆ رووداوه‌كه هه‌ر خه‌سڵه‌تێكی هه‌بێت به "تیرۆریستی" وه‌سفی ده‌كه‌ن و په‌نجه‌ی تۆمه‌ت ئاراسته‌ی موسڵمانان ده‌كه‌ن، به بێ ئه‌وه‌ی هیچ لێكۆڵینه‌وه‌یه‌ك له رووداوه‌كه كرابێت.
ئه‌ردۆغان، ئه‌مڕۆ به‌ر له كۆبوونه‌وه‌ی كابینه‌ی حكومه‌ته‌كه‌ی، ره‌خنه‌ی له ئه‌وروپایی و خۆرئاواییه‌كان گرت و گوتی: هه‌ندێك وڵاتی ئه‌وروپایی هه‌موو هه‌وڵێكیان خستووه‌ته‌گه‌ڕ بۆ ئه‌وه‌ی پێناسه‌ی ئیسلام و شێوه‌ی بكه‌نه‌وه.
سه‌رۆكی توركیا بۆچوونی خۆی سه‌باره‌ت به رووداوه‌كه‌ی ڤیه‌ننا ده‌ربڕی و گوتی: ئێمه ئیدانه‌ی ئه‌و هێرشه خوێناوییه ده‌كه‌ین، شه‌وی رابردوو كرایه سه‌ر ڤیه‌ننای پایته‌ختی نه‌مسا.
گوتیشی: ئه‌گه‌ر ئه‌نجامده‌ری رووداوه‌كه‌كانی توندوتیژی موسڵمان بێت، ده‌ستبه‌جێ رووداوه‌كه به تیرۆریستی ناوده‌برێت و گوێ به سرووشتی رووداوه‌كه نادرێت.
هه‌روه‌ها گوتی: هێرشكردنه سه‌ر ئیسلام گه‌یشتووه‌ته ئه‌و خاڵه‌ی له هه‌موو رووداوێكی توندوتیژی په‌نجه‌ی تۆمه‌ت ئاراسته‌ی موسڵمانان ده‌كرێت.