Civîna Barzanî ligel aliyên siyasî yên Kurdistanê dest pê kir

K24 – Hewlêr

Civîna Serokê Herêma Kurdistanê Mesûd Barzanî ya ligel alî û partiyên siyasî yên Başûrê Kurdistanê dest pê kir.

Derbarê civînê de peyamnêrê K24ê got: "Berî bi kêliyekê civîna Serokê Herêma Kurdistanê Mesûd Barzanî ligel alî û partiyên siyasî dest pê kir. Di civênê de wê li ser sê xalan bê rawestandin. Pirsa serokatiya Herêma Kurdistanê, meseleya referandûmê û krîza aborî."

Herwiha da zanîn ku Cîgirê Serokê Herêma Kurdistanê Kosret Resûl, Serokwezîrê Herêma Kurdistanê Nêçîrvan Barzanî û cîgirê wî Qubad Talabanî jî beşdarî civînê dibin.

Şanda Yekîtiya Niştimanî ya Kurdistanê (YNK) ji Mela Bextiyar, Hakim Qadir, Sadî Pîre û Umer Fetah pêk tê. Di şanda Partiya Demokrat a Kurdistanê (PDK) de Fazil Mîranî, Mehmûd Mihemed cih digrin. Ji Yekgirtûya Îslamî ya Kurdistanê Sekreterê Giştî Mihemed Ferec beşdar dibe. Herwiha partiyên siyasî yên din ên Herêma Kurdistanê beşdarî civînê dibin ji xeynî Tevgera Goran û Komela Îslamî ya Kurdistanê ku ragihandibûn tevlî civînê nabin.

Berî niha Serokê Dîwana Serokatiya Herêma Kurdistanê Fûad Hûsên ji Kurdistan24ê re gotibû: "Bi armanca dîtina çareseriyekê û gotûbêjkirina rewşa Herêma Kurdistanê, hemû aliyên siyasî yên Başûrê Kurdistanê vexwendine civînê."