Serokê Parlamentoya Tirkiyê daxwaza destûreke olî dike

K24- Enqerê

Serokê Parlamentoya Tirkiyê Îsmaîl Qehreman dibêje, pêwîstî nîne ku, peyva "Elmaniyetê" di destûra nû ya Tirkiyê de hebe û destûra nû xwe ji dîn dûr nexe.

Qehreman, li Zanîngeha Stenbolê beşdarî Konferansa bi navê "Tirkiyeya Nû û Destûra Nû" bû û da zanîn ku,  li cîhanê tenê di destûrên Fransa, Îrlanda û Tirkiyê de Elmaniyet heye û her yek jî wek dizane bikar tîne.

Qehreman got, Tirkiye damezrînerê Rêxistina Hevkariya Îslamî ye û divê ji mijarên olî xwe dûr nexe û destûrek dîndar bê çêkirin.

Ji aliyê xwe ve Serokê CHPê Kemal Kilcîdar ev yeke bi tundî rexne kir û got: "Elmaniyet yek ji piransîpên pêkvejiyana aştiyane ye, ew kesên ku, dixwazin vê yekê binpêbikin,  bûne sedema têşkçûna rewşa Rojhelata Navîne yên ku, olê tevlî siyasetê dikin."

Di destûra 1924 ya Komara Tirkiyê de dînî dewletê wek îslam hatiye nivîsandin. Ev bend di sala 1928 de ji destûrê hat derxistin û sala 1937, sekulerîzm di destûrê de hat bicihkirin û heta niha berdewam dike.