Rojnamevanên Ewropayê Tirkiyê rexne dikin

K24 – Stanbol

Hejmareke rojnamevan û nûnerên rêxistinên rojnamegeriyê yên Ewropayî digel hevkarên xwe yên li Tirkiyê ji bo ku balê bikêşînin ser rewşa rojnamevanên girtî û ji bo ku wek bêgirtî bê darizandin, li Sîlîvriya Stenbolê hatin ba hev. Koma ku dixwast li ber girtîgeha Sîlîvrîyê daxuyanîyê bide ji ber biryara qedexeya parêzgeriyê li navenda Sîlîvriyê daxuyanî dan.

Li ser girtina rojnamevanan hikûmeta Tirkiye kar û barên derqanûnî û terorî wek hincet nîşan dide. Berpirsê Ragihandina Enstîtuya Çapemenî ya Navneteweyî Steven Ellis got; di destê rayedarên hikûmetê de eger delîl hebin, bila hemûyan nîşanî civatê bide.

Berpirsê Ragihandina Enstîtuya Çapemenî ya Navneteweyî Steven Ellis ji K24ê re axivî û got: “Civata Ewropayî gelek nîgeran e û der barê geşedanên li Tirkiyê de bi awayekî rasteqin nayên agahdarkirin û rojnamevanî wek tohmetbariyek tê dîtin. Ji bo piştevaniya hevkarên xwe yên girtî em xwe digihînin Neteweyên Yekbûyî, Yekîtiya Ewropayê da ku der barê vê mijarê de zêdetir hewl bidin û gav biavêjin.

Endamê Komiteya PEN'ê û Yekitiya Nivîskarên Avusturyayê Martin Roth amaje kir ku girtina rojnamevanan kêmasiya demokariyê nîşan dide.

Endamê Komiteya PEN'ê û Yekitiya  Nivîskarên Avusturyayê Martin Roth

Roth ji K24ê re wiha got: “Em ji girtina rojnamevanan gelek nîgeran in. Em wek nivîskarên Avusturyayî giringiyê didin Aslı Erdogana ku di medyaya Kurdî de xebitiye û ew endama PENe jî. Em di panelên xwe yên li Ewropayê behsa vê mijarê dikin. Divê tu kes ji ber nêrina xwe neyê girtin û neyê tometbarkirin.”

Li gorî amarên saziyên rojnamevaniyê, ji zêdetirî 200 rojnamevan di girtîgehê de ne. Berpirsên hikûmetê jî amaje dikin ku kesên girtî ne ji ber kar û barên xwe yên rojnamevanî ji ber  karên derhiqûqî hatine girtin.