Tirkiye: Divê cîhan rê nede operasyona Idlibê bê kirin

K24 – Navenda Nûçeyan

Hikûmeta Tirkiyê careke din balê dikşîne ser rewşa Îdlibê û dibêje, pêwîst e cîhan rê nede rejîma Sûriyê û hevalbendên wê êriş li Îdlibê bikin, ne tenê karesata mirovî, lê dê bandoreke mezin li siyaset û dîplomasiyê jî bike û pêvajoyên heta niha kirin têk bide.

Peyvdarê Serokomarê Tirkiyê Îbrahîm Kalin da xuyakirin, divê li Sûriyê pêşiya hemû cure komkujiyan bê girtin, ne tenê komkujiyên bi çekên kîmyayî.

Îbrahîm Kalin got: "Piştî Lûtkeya Tehranê jî mixabin duh, îro, başûrê Îdlibê tê bombebarankirin. Êrişa ser Îdlibê ne tenê kareseteke mirovî ye, Wê encamên siyasî û dîplomatîk jî wê bîne. Divê hemû cîhan ser kar bike. Êrişa ser Îdlibê hemû pêvajoyên siyasî dê têk bibe, baweriyan ji holê rake û sedhezar kes dê berê xwe bidin Tirkiyê. Divê Ewropa, Amerîka û hemû alî bi hemahengiyek hewl bidin ku pêşiya êrişê bigrin.

Herwiha got: “Ewropa û Amerîka dibêjin, eger êrişa kîmyayî bê kirin, emê bersiv bidin. Ev nebes e. Sedhezaran kes heta niha hatine kuştin û sedî 99'ê zêdetir ne bi çekên kîmyayî ne. Ev helwest nikare pêşiya komkujî û karesatan bigre. Evê hêz bide rejîmê ku bi çekên konvansiyonel kuştinan berdewam bike."

S. B