Şam: HSD bûye gef li ser çarenûsa bi hezaran xwendekarên Hesekê
Hewlêr (K24) – Wezareta Derve ya Hikûmeta Serokê Sûriyê Beşar Esed bi daxuyaniyekê ragihand, "Hêzên Sûriya Demokratîk (HSD) sektora perwerdehiyê li Hesekê kiriye armanc û gef li ser siberoja bi hezaran zarok û xortên wê parêzgehê çêkiriye".
Di daxuyaniyê de ku îro ajansa nûçeyan a fermî ya Sûriyê SANA belav kiriye, hatiye gotin: “HSDê bi hêza çekan dest daniye ser 2 hezar û 285 dibistanan. Tenê 179 dibistan di destê Rêveberiya Perwerdehiyê ya Hesekê de mane ji bo hemû qonaxên perwerdehiyê.”
Herwiha dibêje: “Ev reftara HSDê, bûye sedema çêbûna zexteke mezin li ser dibistanan û xwendekar neçar bibin ku rêyeke dûr bigrin ber xwe ji bo bigihîjin dibistanê û ji ber vê yekê metirsiyên belavbûna koronayê çend qat bûne.”
Wezareta Derve ya Hikûmeta Beşar Esed dibêje: “HSD pile bi pile sîstema xwendinê li dibistanan yek kiriye û programa xwe ya taybet a xwendinê bi ser xwendekaran de sepandiye, bêyî ku qonaxa temen û jîngeh û rewşenbîrî û civakê li ber çavan bigre.”
Di daxuyaniyê de hatiye gotin: “Armanca programa HSDê ya ku sepandiye, belavkirina nefêmkirin û nexwendewarî ye bi rêya tirsandin û bêparkirina xwendekaran û bi vê yekê jî gef li ser bi hezaran zarok û xortan çêkiriye.”
Herwiha hatiye diyarkirin: “Welatiyên Hesekê, programa wan red kiriye û zarokên xwe dişînin dibistanên fermî yên ser bi Şamê. Ev jî bûye sedema hêrsbûna HSDê, zarok û welatiyên li jêr desthilata wan neçar dikin ku berê xwe bidin dibistanên di bin desthilata wan de.”