Bi beşdariya Serokwezîr konferansa Aboriya Kurdistanê Piştî Koronayê tê sazkirin

Hewlêr (K24) – Bi beşdariya Serokwezîrê Herêma Kurdistanê Mesrûr Barzanî, konferansa "Aboriya Herêma Kurdistanê Piştî Koronayê" ji aliyê jûrên bazirganî û pîşesazî yên Amerîkayê ve tê lidarxistin.

Li gor daxuyaniya Yekîtiya Jûrên Bazirganî û Pîşesazî yên Amerîkayê, konferans di rojên 23-24ê Mijdara 2020an de bi awayekî online, bi beşdariya rayedarên payebilind ên Amerîka û Herêma Kurdistanê û kompaniyên Amerîkî yên li Herêma Kurdistanê veberhênan dikin, tê sazkirin.

Di konferansê de çawaniya pêşvebirina geşeya aborî li Herêma Kurdistanê, derfetên veberhênanê li Herêma Kurdistanê, girîngîdana bi asayîşa xurek, siberoja peywendiyên Amerîka û Iraqê di warê enerjiyê de dê werin gotûbêjkirin.

Li gor daxuyaniya Nûnertiya Hikûmeta Herêma Kurdistanê ya li Washingtonê, Serokwezîrê Herêma Kurdistanê Mesrûr Barzanî tevî rayedarên payebilind ên Amerîkayê, beşdarî konferansê bibin û têbînî û daxwazên beşdaran dê tomar bikin.