Li rojavayê Kurdistanê 6 kesên din bi Koronayê canê xwe ji dest dan

Navenda Nûçeyan (K24) – Li rojavayê Kurdistanê û herêmên Rêveberiya Xweser, 6 kesan bi vîrûsa Koronayê (Covid-19) canê xwe ji dest dan û 113 pêketî jî hatin tomarkirin.

Hevserokê Desteya Tenduristiyê ya Rêveberiya Xweser ragihand, di 24 demjimêrên borî de 6 kesan bi Koronayê canê xwe ji dest dane. Haletên mirinê, 4 mêr li Dêrik, Amûde, Dêrazor û Tebqayê û 2 jin li Heseke û Qamişlo ne.

Dr. Ciwan Mistefa, Hevserokê Desteya Tenduristiya Rêveberiya Xweser ragihand; 113 kes bi vîrûsa Koronayê ketine. Ji wan, 25 kes li Hesekê, 9 kes li Qamişlo, 16 kes li Dêrikê, 1 kes li Girkê Legê, 2 kes li Amûdê, 2 kes li Dirbêsiyê, 2 kes li Dêre Zorê, 5 kes li Şehbayê, 17 kes li Kobanî, 24 kes li Tebqayê, 1 kes li Minbicê û 9 kes li Reqayê ne.

Dr. Ciwan Mistefa eşkere kir ku di nav 24 demjimêran de 25 kes ji wî vîrûsê baş bûne.

Bi vî awayî, hejmara kesên li rojavayê Kurdistanê wek hilgirên vîrûsa Koronayê hatine tomarkirin gihiştiye 6591 kesan, ji wan 957 kes baş bûne û 176 kesan jî jiyana xwe ji dest dane.

Rêveberiya Xweser ji bo rêgirtin li belavbûna zêdetir a vîrûsa Koronayê, qedexeya giştî ji bo 10 rojan li Heseke, Qamişlo, Tebqa û Reqayê ragihand. Qedexe ji roja 26ê vê mehê ve dikeve warê bicihkirinê.