Encûmena Wezîran pêngavên cîbicîkirina yasaya budceya federalî gotûbêj kir

Hewlêr (K24) – Bi serperiştiya Serokwezîrê Herêma Kurdistanê Mesrûr Barzanî îro çarşemê 16ê Hezîrana 2021ê, bi amadebûn Cîgirê Serokwezîr Qubad Talebanî civîna heftane ya Encûmena Wezîran birêve çû.

Di destpêka civînê de Serokwezîr Mesrûr Barzanî tevî dûpatkirina pabendbûna Hikûmeta Herêma Kurdistanê bi yasaya budceya federalî, tekezkirina hikûmeta federalî jî li ser cîbicîkirina yasayê û şandina beşa budceya Herêmê bilind nirxand. Serokwezîr destxweşî li şanda danûstankar a Hikûmeta herêma Kurdistanê kir ku bi awayekî serkeftî erkê xwe bi cih anîne û bi her awayî li ser maf û heqên darayî yên Herêmê rijd bûne. Serokwezîr Mesrûr Barzanî xwazyar bû ku ev rêkeftin bibe sedema baştirbûna rewşa darayî ya Herêma Kurdistanê.

Piştre Serokwezîr ronahî xistiye ser serdana şanda bilind a Hikûmeta Herêma Kurdistanê ji bo her du welatên Belçîka û Yûnanistanê û diyar kiriye ku rayedarên payebilind ên van welatan, amadebûna xwe ji bo berdewamkirina hemahengî û piştevanîkirina bernameya çaksazî ya Hikûmeta Herêma Kurdistanê nîşan dane û bi çavekî girîng li pêgeha Herêma Kurdistanê dinêrin weke faktoreke girîng a seqamgîriyê li herêmê.

Cîgirê Serokwezîr û endamên şanda danûstankar a Herêmê, geşedanên herî dawî yên danûstandinên xwe yên ligel wezaretên pêwendîdar ên hikûmeta federalî pêşkêş kirin taybet bi danîna mekanîzmaya cîbicîkirina madeya 11 ya di yasaya budceya federalî ya sala 2021ê de.

Di beşeke din a civînê de, Wezîrê Aborî û Darayî Awat Şêx Cenab li ser amadekariyên herî dawî yên reşnivîsa projeyasaya budceya Herêma Kurdistanê bo sala 2021ê zanyarî pêşkêş kirine.

Herwiha di beşa dawî ya civînê de de jî, li ser rêkûpêkkirina dewama saziyên Hikûmeta Herêma Kurdistanê gotûbêj hat kirin û biryar hat dayîn ku ji hefteya bê ve, dewama fermangehên hikûmetê were asayîkirin.