Cebar Yawer: Hikûmeta Iraqê nikare komên neyasayî kontrol bike

Hewlêr (K24) – Li ser gotinên Wezîrê Berevaniyê yê Iraqê ku duh di panelekê de gotibû; derxistina PKK û hêzên Tirkiyê ji deverên sînorî, erkê hêzên Pêşmerge ye, Sekreterê Giştî yê Wezareta Pêşmerge Cebar Yawer ragihand; Wezîrê Berevaniyê nekarî bersiveke rast bide vê pirsê.

Sekreterê Giştî yê Wezareta Pêşmerge Cebar Yawer ji K24ê re diyar kir: “Me ji Wezîrê Berevaniyê yê Iraqê pirsyar kir ku em çawa dikarin bi hev re û bi hevbeşî kêşeya hebûna PKK û leşkerkêşiya Tirkiyê li deverên sînorî yên Herêma Kurdistanê çareser bikin, Wezîrê Berevaniyê yê Iraqê bersiveke razîker neda û got; 'Berpirsyariya wergirtina helwestê li hember hebûna hêzên Tirkiyê û PKKê li deverên sînorî yên Herêma Kurdistanê li stûyê hikûmeta Iraqê nîne û divê Pêşmerge şerê PKKê bike û wan hêzan ji wan deveran derbixe'.”

Cebar Yawer eşkere kir ku dema pirsyareke din arasteyî Wezîrê Berevaniyê kiriye, wezîr yekser hêrs bûye û mîkrofon avêtiye û ji panelê derketiye.

Li ser rewşa Şingalê û hebûna Heşda Şeibî li wê deverê û daxwaza navdewletî ya ji bo derketina çekdaran ji Şingalê, Cebar Yawer ragihand; kêşeyeke mezin li ber cîbicîkirina rêkeftina Şingalê, asayîkirina rewşa wê navçeyê û vegerandina awareyan bo cih û warên wan heye.

Cebar Yawer destnîşan kir ku li gor rêkeftina asayîkirina rewşa Şingalê, diviyabû 3 hezar kes ji xelkê navenda Şingalê weke hêzeke polîs ji bo parastina navçeyê werin damezrandin, lê mixabin heta niha hikûmeta federal nekariye rêkeftina Şingalê cîbicî bike.