Serokê Parlamentoya Urdinê serdana Herêma Kurdistanê dike

Navenda Nûçeyan (K24) – Serokê Parlamentoya Urdinê bi serokatiya şandekê bi serdanekê gihîşt Herêma Kurdistanê û li Firokxaneya Navdewletî ya Hewlêrê ji aliyê Seroka Parlamentoya Kurdistanê Rêwaz Fayiq pêşwazî lê hate kirin.

Peyamnêrê K24ê li Firokxaneya Navdewletî ya Hewlêrê da zanîn, Serokê Parlamentoya Urdinê Ebdulmunim El-Odat destpêkê serdana Parlamentoya Kurdistanê dike û ligel Desteya Serokatiyê û serokên firaksiyonan dicive.

Li gor zanyariyên peyamnêrê me, Serokê Parlamentoya Urdinê her îro jî serdana Serokê Hikûmeta Herêma Kurdistanê dike, piştre bi Serokê Herêma Kurdistanê re dicive. Herwiha dê hevdîtina wî bi Serok Barzanî re jî hebe.

Biryar e, Serokê Parlamentoya Urdinê Ebdulmunim El-Odat di konferanseke rojnamevî de jî, armanca serdana xwe ji Herêma Kurdistanê re aşkere bike.

Welatê Urdinê, yek ji welatên ku pêwendiyên wê yên dîrokî bi serkirdeyên Kurd û bi taybet Serok Barzanî re hene. Herwiha kusolxaneya wê li Herêma Kurdistanê heye û pêwendiyên xwe bi pêş bixe û hevahengiya di navbera her du aliyan de berfirehtir bike.

Serokê Parlamentoya Urdinê Ebdulmunim El-Odat duhî 4/9/2021 bi serdanekê gihîştibû Bexdayê û bi berpirsên pilebilind ên Iraqê re civiyabû.