Sibe Pelosi dê ligel Serokê Taywanê bicive

Navenda Nûçeyan (K24) – Tevî gefên tund ên Çînê, balafira serbazî ya Seroka Encûmena Nûneran a Amerîkayê Nancy Pelosi gihîşte welatê Taywanê û sibe dê ligel serokê wî welatî bicive.

Piştî gihîştina Nancy Pelosi bo welatê Taywanê, Çînê demildest sîstema berevanî ya esmanî, li esmanê Taywanê çalak kir û artêşa xwe xiste rewşa amadebaşiyê, herwiha firokeyên şer jî şandin esmanê Taywanê û gefa encamdana operasyona serbazî dixwe.

Berdevkê Wezareta Berevanî yê Çînê ragihand, ew ê rêzeoperasyonên serbazî yên diyarkirî encam bidin.

Herwiha eşkere kir ku Çîn dê berevaniya serwerî û yekbûna axa xwe bike û ji bo serxwebûna Taywanê li dijî destwerdana derekî ye.

Wezareta Derve ya Çînê jî ragihand, tiştê ku Amerîka dike, paşguhkirina prensîpa yek Çîn e û lîstina bi agir e, kesê ku bi agir bilîze, dişewitîne, eger Washington li ser vê siyaseta xelet berdewam be, divê berpirsyariya encamên wê jî bigre ser xwe.