Îran bi top û dronan êrîşî navçeyên sînorî yên Herêma Kurdistanê dike

Navenda Nûçeyan (K24) – Fermandarê leşkerî yê di Komeleya Zehmetkêşan a Kurdistanê Emced Husênpenahî ragihand, Supaya Pasdarê Îranê navçeyên sînorî yên Herêma Kurdistanê bi giranî topbaran kirin.

Emced Husênpenahî ji K24ê re got, hêzên Îranê şeva borî bi dron, top û mûşekan êrîş kir û ziyanên madî gihîştin baregehên wan, lê Pêşmergeyên wan selamet in.

Piştî kuştina keça Kurd a Rojhilatê Kurdistanê Jîna Emîn û derketina xwepêşandanan li Rojhilatê Kurdistanê û Îranê, rojane navçeyên sînorî yên Herêma Kurdistanê tên topbarankirin û ziyanên medî yên mezin gihîştina zozan û daristanan.

Her wiha roja 28ê Îlona borî jî, Supaya Pasdarên Îranê bi riya droneyên bombekirî û mûşekan êrîşî ser baregehên Partiya Demokrat a Kurdistana Îranê li bajarokê Koyê, Komeleya Zehmetkêşan a Kurdistana Îranê li Zirgiwêz li Silêmaniyê û Partiya Azadiya Kurdistanê li Pirdê kirin. Di encamê de 17 kesan şehîd bûn û zêdirî 50 kesî jî birîndar bûn.