Li ser Keleha Hewlêrê platforma Xwebexş Kurdistan hat ragihandin

Hewlêr (K24) – Platforma Xwebexş Kurdistan wek mezintirîn û çalaktirîn rêxistina xwebexşiyê li Herêma Kurdistanê hat ragihandin û di merasîmekê de li ser Keleha Hewlêrê hûrgirlî û armancên platformê hatin ragihandin.

Êvara 22ê Hezîrana 2023an, platforma Xwebexş Kurdistan li jêr dirûşma "Bişiyankirina xwebexşan û bihêzkirina Kurdistanê" hat ragihandin û wek rêkxerên vê çalakiyê diyar kirin, vîzyona wan di vî karî de bihêzkirina Kurdistanê ye bi rêya hêza karê xwebexşiyê ve.

Nûnerê Xwebexşan di gotara xwe ya merasîmê de diyar kir, ev proje bi serperiştî û piştevaniya Arîn Mesrûr Barzanî hatiye encamdan ji bo yekxistina karê xwebexşan li Herêma Kurdistanê û komkirina hewldanan di platformekê de ji bo zêdetir rêkxistina karên xwebexşiyê û yekxistina hêzên xwebexşan, da ku karên wan zêdetir berhemdar bibe ji bo xizmetkirina zêdetir a Kurdistan û civakê.

Platforma Xwebexş Kurdistan di warên perwerde, jîngeh, tendirustî, xizmeta civakî, huner, çand, ajeldostî, mafên mirovan û pêşvebirina civakê de kar dike û tekezî li ser pabendbûna bi dabînkirina jîngeheke tendirust û parastî ji bo xwebexşan, pêşkêşkirina ezmûn û rahênan, pêkanîna derfetên cûr bi cûr û dakokîkirina li mafên xwebexşan, dike.