Serokê Giştî yê PWKê: Kurdistan24 destkeftineke hemû Kurd û Kurdistanîyan e
Navenda Nûçeyan (K24) – Serokê Giştî yê Partîya Welatparêzên Kurdistanê (PWK) Mustafa Ozçelîk, bi boneya 8 salîya damezirandina Saziya Kurdistan24ê bo Lêkolîn û Ragihandinê, peyameke pîrozbahiyê arasteyî Rêveberê Giştî yê Sazîya Kurdistan24ê Ehmed Zawîteyî kir.
Mustafa Ozçelîk di peyama xwe de dibêje: “Di van 8 salan da, Dezgeha Kurdistan24ê û Kurdistan24 TVyê, ne bes wek dengê gelê me yê Başûrê Kurdistanê, herwiha wek dengê gelê me yê Bakur, Rojava û Rojhilatê Kurdistanê jî wazîfeyeke neteweyî, niştimanî bicîh anî.”
Peyama Serokê Giştî yê PWKê Mustafa Ozçelîk:
Dezgeha Kurdistan24ê ji bo lêkolînan û ragehandinê û Kurdistan24ê TVyê di meşa ragehandina Kurdistanê da, 8 salên xwe bihurandin.
Di van 8 salan da, Dezgeha Kurdistan24ê û Kurdistan24 TVyê ne bes wek dengê gelê me yê Başûrê Kurdistanê, her weha wek dengê gelê me yê Bakur, Rojava û Rojhilatê Kurdistanê jî wazîfeyeke neteweyî, niştimanî bicîh anî.
Di belavkirina nûçe û zanyarîyên li Kurdistanê û cîhanê da, di amadekirina bernameyên li ser mijarên neteweyî, niştimanî da Kurdistan24 TVyê bi awayekî profesyonelî xebateke birûmet pêk anî.
Kurdistan24 TV destkeftineke hemû Kurd û Kurdistanîyan e.
Bi hêvîya, gelek salên din ên têr û tije û bi hêvîya ku ji bo her perçeyekî Kurdistanê bernameyên taybetir û berfirehtir bêne amade kirin, ez li ser navê xwe û li ser navê hemû rêvebir û endamên partîya me 8 salîya Dezgeha Kurdistan24ê û Kurdistan24 TVyê pîroz dikim, ji cenabê we û ji hemû xebatkar û kedkarên Kurdistan24 TVyê ra serkeftinê dixwazim.
Li gel rêzên xwe
31.10.2023
Mustafa Ozçelîk
Serokê Giştî yê Partîya Welatparêzên Kurdistanê (PWK)